Erlan Qoshanov: Qazaqstan-Túrkııa dostyq saıabaǵynyń ashylýy eki el yntymaǵyn nyǵaıtady
Erlan Qoshanov Ankarada Túrkııa Respýblıkasy Uly Ulttyq Jınalysynyń tóraǵasy Mustafa Shentoppen birge Qazaqstan-Túrkııa dostyq saıabaǵynyń saltanatty ashylý rásimine qatysty.
Іs-shara Túrkııa Respýblıkasynyń 100 jyldyǵymen tuspa-tus kelip otyr. Májilis tóraǵasy barsha túrik halqyn torqaly toımen quttyqtap, baq-bereke tiledi.
«Qazaqstan men Túrkııa arasyndaǵy qarym-qatynas keńeıtilgen strategııalyq yntymaqtastyq deńgeıine jetip, barlyq salada qarqyndy damyp jatyr. Oǵan, árıne, memleketterimizdiń basshylary Qasym-Jomart Kemeluly Toqaev pen Rejep Taııp Erdoǵannyń nátıjeli kelisimderiniń arqasynda qol jetkizip otyrmyz. Aldaǵy ýaqytta da biz kóshbasshylarymyzdyń ekijaqty yntymaqtastyqty kúsheıtýge baǵyttalǵan jumysyn Parlament deńgeıinde jalǵastyratyn bolamyz», – dedi Erlan Qoshanov.
Májilis spıkeri saıabaqtyń ashylýy túbi bir, mádenıeti men tarıhy ortaq tamyrlas eki eldiń dostyǵy men yntymaǵyn nyǵaıta túsetinin atap ótti.
«Qazaqta «Aǵash tamyrymen myqty, adam dostarymen myqty» degen sóz bar. Biz Túrkııamen dostyǵymyzdy, baýyrlastyǵymyzdy joǵary baǵalaımyz. Bolashaqta bul saıabaq Ankara turǵyndary men qonaqtary úshin ásem demalys ornyna aınalady dep senemiz», – dedi Májilis spıkeri.
Saıabaq Ankaranyń kóne tarıhı ortalyǵy – Mamak aýdanynda ornalasqan. Aýdany 14 myń sharshy metr.
Onda otbasylyq demalys, júgirý jáne dene shynyqtyrýmen aınalysý úshin barlyq jaǵdaı jasalǵan. Saıabaqta Kúltegin, Bilge Qaǵan, Tonykók jazba eskertkishteri ornatylǵan.
Sondaı-aq qazaqtyń uly aqyny Abaı Qunanbaıulynyń men dana fılosof Ál-Farabıdiń músinderi bar.
Baýyrlas halyqtarymyzdyń arasyndaǵy dostyqty tereńdetý jaıy eki el Parlamentteri spıkerleriniń ekeýara kezdesýinde de áńgimege arqaý boldy.
Erlan Qoshanov áýeli Túrkııada bolǵan joıqyn jer silkinisi barsha qazaq halqynyń qabyrǵasyn qaıystyrǵanyna toqtalyp, kóńil aıtty.
Sonymen birge aldaǵy ýaqytta Prezıdent Qasym-Jomart Toqaevtyń tapsyrmasymen jer silkinisi aýmaǵynda birqatar áleýmettik ǵımarattyń qurylysy josparlanyp otyrǵan atap ótti.
Májilis tóraǵasy Qazaqstannyń Túrkııamen parlamentaralyq yntymaqtastyqty odan ári nyǵaıtýǵa múddeli ekenin aıtty.
– «Búgingi kúnge deıin dostyq toptar men parlamenttik komıtetter deńgeıindegi yqpaldastyǵymyz oń nátıje kórsetip keldi. Sondyqtan bul qarqynymyzdy básendetpeı, belsendilik tanytyp, osy baǵytta jumysymyzdy jalǵastyrýymyz qajet. Bul zańnama salasynda jan-jaqty tájirıbe almasýǵa múmkindik beredi. Biz barlyq baǵytta belsendi qyzmet etýge daıynbyz», – dedi Erlan Qoshanov.
Kezdesý sońynda taraptar Májilis pen Uly Ulttyq Jınalysy arasyndaǵy yntymaqtastyq týraly hattamaǵa qol qoıdy.
Májilis tóraǵasynyń Túrkııaǵa sapary jalǵasyp jatyr.
28 sáýirde Erlan Qoshanov Túrki memleketteri Parlamenttik Assambleıasynyń Keńesi otyrysy men Túrki memleketteri Parlamenttik Assambleıasynyń HІІ plenarlyq otyrysyna qatysady.
