Erlan Qoshanov Qaraǵandyda jylý baǵasyn tómendetýdi tapsyrdy
ASTANA. QazAqparat - Qaraǵandy oblysynyń ákimi Erlan Qoshanov qalamyzdaǵy JEO-3 aralap qaıtty. Aımaq basshysy stantsııanyń jumysymen tanysty. Ony qyzyqtyrǵan basty máseleler - jylytý maýsymyna daıyndyq barysy men shekti tarıfi boldy, dep habarlaıdy Qaraǵandy oblysy ákimdiginiń saıty.
«Qaraǵandylyq JEO-1 jáne JEO-3-ti 2017-2018 jylǵy jylytý maýsymyna daıyndaý úshin 3,4 mlrd teńge josparlanǵan, onyń ishinde qubyr jáne qazandyq agregattarynyń kúrdeli jáne keńeıtilgen aǵymdaǵy jóndeý jumystaryna 2,6 mlrd teńge, al qosalqy jabdyqtar, ǵımarat pen qurylymdardy jóndeýge - 782 mln teńge qarastyrylǵan.
JEO-3-te bir qazandyq agregaty men bir týrbınany kúrdeli jóndeýden ótkizý josparlanyp otyr. Jeti qazandyq agregat pen bes týrbınada aǵymdaǵy jóndeý jumystary júrgiziledi. Barlyq jumystar josparly merzimge saı kestemen ótkizilip jatyr», - dedi «Qaraǵandy Energoortalyq» JShS bas dırektory Mádı Ábishev.
Jańǵyrýdan soń qaraǵandylyq JEO-3 belgilengen elektr qýaty kórsetkishi boıynsha elimizdegi eń iri jylý elektr ortalyǵy boldy. Qazirgi tańda onyń qýattylyǵy 670 MVt quraıdy.
Belgilengen jylý qýaty - saǵatyna 1400 Gkal-dan asady. Stantsııa qalaǵa qajetti jylýdy taratýǵa daıyn. Alaıda ony jańa tutynýshylarǵa jetkizý úshin úshinshi jylý shyǵarǵysh salý kerek. Bul másele burynnan beri qozǵalyp keledi, joba qymbat. Bul rette bılik qoldaýy qajet. Erlan Qoshanov bul problemalardan habardar jáne ony sheshý joldaryn kompanııa basshylarymen birge talqylady.
2009-shy jyldan beri Úkimetpen energııa kózderi úshin shekti tarıf engizgeli kompanııa kezeń-kezeńmen ınvestıtsııalyq baǵdarlamany júzege asyryp keledi. Kompanııanyń málimetinshe 5 jyl aralyǵynda JEO-3 jabdyqtaryn qaıta qurýǵa, jańǵyrtýǵa jáne qýatty keńeıtýge 65 mlrd. teńge jumsalǵan eken. Bul sharalar stantsııanyń beriktigin anaǵurlym ulǵaıtqan. Sonymen qosa shekti tarıften túsken túsimder 40 mlrd, teńgeni quraǵan.
«Men túsinemin, shekti tarıfti engizgende ol qajet boldy. Al qazir turǵyndar úshin ony tómendetý múmkindikterin qarastyrý kerek», - dep sanaıdy Erlan Qoshanov.
Oblys ákimi óziniń orynbasary Anatolıı Shkarýpaǵa kompanııa basshylyǵymen osyndaı saraptama jasap, esepteýler jasaýdy tapsyrdy.
