Erlan Qoshanov: Qaharmandardyń erligin máńgi este saqtaý – bizdiń qasıetti boryshymyz
VOLGOGRAD. KAZINFORM — Májilis tóraǵasy Erlan Qoshanov bastaǵan Parlament delegatsııasy Volgogradta «Uly mura – ortaq bolashaq» atty halyqaralyq forýmǵa qatysty. Іs-shara Uly Otan soǵysyndaǵy Jeńistiń 80 jyldyǵyna arnaldy. Bul týraly Májilistiń baspasóz qyzmeti málim etti.
Forýmǵa Qytaı, Qyrǵyzstan, Ózbekstan, Tájikstan, Túrikmenstan, Ázerbaıjan, Armenııa, Vetnam, Kýba, Mońǵolııa, Serbııa, Slovakııa jáne basqa da elderdiń Parlament delegatsııalary qatysty.
Qorytyndy sessııa Reseı Federatsııasynyń Prezıdenti Vladımır Pýtın men Belarýs Respýblıkasynyń Prezıdenti Aleksandr Lýkashenkonyń qatysýymen ótti.
Forýmnyń ashylýynda sóz sóılegen Erlan Qoshanov Ekinshi dúnıejúzilik soǵys adamzat shejiresindegi eń qaıǵyly oqıǵanyń biri retinde kópultty Qazaqstannyń ortaq tarıhynyń bir bóligi bolyp qalǵanyn atap ótti.
– Biz osynaý qasıetti jerde Uly Otan soǵysyndaǵy Jeńistiń 80 jyldyǵy qarsańynda jınalyp otyrmyz. Bul Jeńis – dúnıejúzilik mańyzy zor tarıhı oqıǵa. Soǵysty, qaharmandardy, olardyń erligin máńgi este saqtaý – bizdiń qasıetti boryshymyz. Osy oraıda Qazaqstan Respýblıkasynyń Prezıdenti Qasym-Jomart Toqaevtyń «Qazaqstan árqashan tarıhı shyndyqtyń jáne adamzat jylnamasyndaǵy eń qandy qasap týraly shynaıy kózqarastyń saqtalǵanyn qalaıdy» degen sózine nazar aýdarǵym keledi, – dedi Májilis spıkeri.
Ol sondaı-aq Uly Jeńistiń 80 jyldyǵyna oraı Qazaqstan boıynsha eki myńǵa jýyq eske alý, ǵylymı-zertteý, aǵartýshylyq jáne basqa da is-sharalar ótkiziletinin aıtty. Astanadaǵy áskerı sherý eń aýqymdy oqıǵa bolmaq. Memleket basshysynyń bastamasymen elimizdiń túkpir-túkpirindegi eldi mekenderde bes júzden astam kóshege soǵysqa qatysqan jergilikti qaharmandardyń esimi beriledi.
Erlan Qoshanov soǵys jyldarynda Qazaqstanda barlyq maıdanda shaıqasqan ondaǵan áskerı bólim qurylǵanyn aıtty. Jalpy maıdanǵa 1,7 mıllıonnan astam qazaqstandyq attandy. Bul sol kezdegi respýblıka halqynyń tórtten bir bóligi bolatyn. Olardyń jartysynan astamy urys alańynan oralmady. 500 qazaqstandyq Keńes Odaǵynyń Batyry ataǵyn aldy, 100-den astamy Dańq ordeniniń tolyq kavaleri boldy. Al tórteýi eki márte Keńes Odaǵynyń Batyry ataǵyn ıelendi.
Májilis spıkeri Stalıngrad maıdanynda – Ekinshi dúnıejúzilik soǵys tarıhyndaǵy eń iri ári qantógisti urystardyń birinde úsh júz myńnan astam qazaqstandyq jaýynger erlikpen shaıqasqanyn eske saldy. Solardyń tórteýi – Nurken Ábdirov, Qarsybaı Sypataev, Tımofeı Pozolotın jáne Ǵaıaz Ramaev Keńes Odaǵynyń Batyry ataǵyna ıe boldy.
Sapar barysynda Májilis delegatsııasy Mamaev qorǵanyndaǵy eske alý is-sharalaryna qatysty. Munda depýtattar Stalıngrad qorǵanysy kezinde erlikpen shaıqasqan qazaqstandyqtarǵa arnalǵan eskertkishke jáne 1942 jyly jeltoqsanda 23 jasynda shaıqasta erlikpen qaza tapqan Keńes Odaǵynyń Batyry, qazaqstandyq áskerı ushqysh Nurken Ábdirovtiń eskertkish taqtasyna gúl shoqtaryn qoıdy.
«Stalıngrad shaıqasy» mýzeı-panoramasyn aralaý kezinde Erlan Qoshanov Májilis atynan mýzeıge Nurken Ábdirovtiń týǵan jeri Qaraǵandyda ornatylǵan eskertkishiniń shaǵyn kóshirmesin syıǵa tartty.
Sondaı-aq Qazaqstan depýtattary forýmnyń paneldik sessııalaryna jáne Batyrlar alleıasyndaǵy Máńgilik alaý jaǵý rásimine qatysty.
Eske sala keteıik, buǵan deıin Almatyda soǵys jyldary erlik kórsetken qazaqstandyqtar týraly jańa fılmder túsiriletinin jazǵan bolatynbyz.