Erlan Qoshanov Halyq Keńesiniń tóraǵasy bolyp saılandy

Búgin qurylǵan Sanaq komıssııasy Qazaqstan Halyq keńesiniń tóraǵasyn saılaýǵa berilgen daýystardy sanap, nátıjesin anyqtady.

— Daýys berýge arnalǵan jáshik ashylǵan kezde 121 bıýlleten alyndy. Jaramsyz bıýlleten joq. Berilgen daýystar kelesideı bólindi: jaqtaǵandar — 120 daýys, qarsy bolǵandar — joq, qalys qalǵandar — bireý. Osylaısha Qazaqstan Halyq keńesiniń tóraǵasy bolyp Qoshanov Erlan Jaqanuly saılandy, — dedi Sanaq komıssııasynyń tóraǵasy Murat Ábenov Prezıdenttik ortalyqta.

Óz sózinde Erlan Qoshanov úlken senim artyp, Qazaqstan Halyq keńesi tóraǵalyǵyna usynǵan Memleket basshysyna jáne Halyq keńesiniń barlyq múshesine rızashylyǵyn bildirdi.

— Búgin barshamyz úshin aıryqsha kún. Biz el ómirinde erekshe oryn alatyn jańa ınstıtýttyń qalyptasqanyna kýá bolyp otyrmyz. Onyń jumysyna tikeleı aralasý qurmetine ıe boldyq. Memleketimizdiń saıası júıesinde halyqtyń múddesin bildiretin jańa saıası organ paıda boldy. Halyq keńesiniń qurylýy — Memleket basshysy júrgizip otyrǵan aýqymdy ári júıeli saıasattyń naqty nátıjesi, — dep atap ótti E. Qoshanov.

Aıta keteıik, Erlan Jaqanuly Qoshanov 64 jasta. Ol 1962 jyly 14 tamyzda Qaraǵandy oblysynyń Shet aýdanynda týǵan. Jezqazǵandaǵy Qaraǵandy polıtehnıkalyq ınstıtýtynyń fılıalynda (ınjener-mehanık) jáne Qazaq memlekettik basqarý akademııasynda (halyqaralyq ekonomıst) bilim alǵan. Eńbek jolyn Jezqazǵan ken-metallýrgııa kombınaty baıytý fabrıkasynyń slesari, sheberi bolyp bastaǵan.

Keıinirek Jezqazǵan oblystyq syrtqy ekonomıkalyq baılanystar komıtetinde túrli qyzmetter atqardy, QR Parlamenti Senatynyń depýtaty, Úkimettiń Parlamenttegi ókili, Kólik jáne kommýnıkatsııa vıtse-mınıstri, Azamattyq avıatsııa komıtetiniń tóraǵasy boldy.

Ár jyldary QR Premer-Mınıstri Keńsesi Basshysynyń orynbasary — Úkimettiń Parlamenttegi ókili, QR Premer-Mınıstri Keńsesiniń Basshysy, Qaraǵandy oblysynyń ákimi, QR Prezıdenti Ákimshiliginiń Basshysy qyzmetterin atqaryp, 2022 jyly QR Parlamenti Májilisiniń Tóraǵasy jáne «AMANAT» partııasynyń tóraǵasy boldy.

Buǵan deıin Prezıdent Qasym-Jomart Toqaev Qazaqstan Halyq Keńesi tóraǵasy qyzmetine E. Qoshanovtyń kandıdatýrasyn usynǵan edi.

Eske sala ketsek, jyl basynda Prezıdent Qasym-Jomart Toqaev Qyzylordadaǵy V Ulttyq quryltaıda Halyq keńesi ınstıtýtynyń zańdyq mártebesi qandaı bolatynyn aıtyp berdi. 

Keshe Prezıdent Qasym-Jomart Toqaev Qazaqstan Halyq Keńesiniń 126 adamnan turatyn quramyn bekitti. Onda etnomádenı birlestikterden — 42, qoǵamdyq birlestikterden — 42, máslıhattar men óńirlik qoǵamdyq keńesterden — 42 ókil bar.