Erlan Qoshanov: Gerb máselesiniń talqyǵa túsýi – qoǵamdaǵy pikir alýandyǵynyń kórinisi

ASTANA. KAZINFORM – Memleket basshysy Ulttyq quryltaıda kótergen mańyzdy máseleler jóninde Parlamenttik tyńdalym ótkizilmek. Bul týraly Májilistiń jalpy otyrysynda palata spıkeri Erlan Qoshanov aıtty.

«Arheologııa, memlekettik rámizder men memlekettik nagradalar salasyndaǵy zańnamany jetildirý jumysy kútip tur. Máselen, keıingi kúnderi qoǵam qyzý talqylap jatqan Gerb máselesi ózekti bolyp otyr. Shyntýaıtynda, atalǵan máseleniń talqyǵa túsýi – qoǵamdaǵy pikir alýandyǵynyń kórinisi. Qoldanystaǵy Gerbtiń beınesine baılanysty jastar, qoǵam belsendileri tarapynan kóterilgen usynysqa Prezıdentimiz quryltaıda óz pikirin bildirip, ortaq, baıypty sheshimge kelýge shaqyrdy. Memleket basshysy osylaısha Gerb máselesin ashyq talqylaýǵa shyǵaryp otyr», - dedi Erlan Qoshanov.

Osy oraıda palata spıkeri jalpy jurtshylyqpen birge, memlekettik sımvolıkany zerttep júrgen geraldıka salasynyń kásipqoı mamandarynyń usynystary jete talqylanýy qajettigin basa aıtty. 

«Bizdiń Gerb – san ǵasyrlyq tarıhymyzdy tańbalaıtyn, memleketimizdiń aıbynyn asyratyn, halqymyzdyń asqaq rýhyn aıshyqtaıtyn negizgi sımvol bolýy kerek. Eń bastysy, elimizdiń bolashaqqa umtylysyn beıneleıtin biregeı atrıbýtıkasyna aınalýy tıis. Bul, árıne, qoǵam men arnaýly komıssııanyń quzyretindegi másele. Prezıdent belgilep bergen baǵyt-baǵdar bárińizge túsinikti dep oılaımyn. Sondyqtan Ulttyq quryltaıda kóterilgen mańyzdy máseleler jóninde Parlamenttik tyńdalym ótkizýimiz qajet dep sanaımyn. Sebebi keleli jıynda aıtylǵan naqty usynystardy oryndaý boıynsha maqsat mindetterimizdi birge aıqyndaýymyz kerek», - dedi Erlan Qoshanov.