Erlan Qoshanov: Elbasynyń tapsyrmalary jedel júzege asýy tıis
QARAǴANDY. QazAqparat - Qaraǵandy oblysynda Elbasynyń qyrkúıektegi oblysqa jasaǵan sapary barysynda bergen tapsyrmasyna saı júzege asyrylýy tıis jobalar bastaldy, dep habarlaıdy Qaraǵandy oblysy ákimdiginiń baspasóz qyzmeti.
Baspasóz málimetterine qaraǵanda, Temirtaýda jeltoqsanda metallýrgter qalasynyń turǵyndary úshin medıtsınalyq kómekti aıtarlyqtaı jeńildetetin emhananyń qurylysy bastalady.
Oblys ákimdigindegi apparattyq jınalysta jaýaptylar Elbasy tapsyrmalarynyń oryndalý barysy týraly esep berdi.
Esterińizge sala keteıik, 2018-shi jyldyń 6-7 qyrkúıeginde QR Prezıdenti Nursultan Nazarbaev Qaraǵandy oblysyna is-saparymen kelip qaıtqan bolatyn.
Qaraǵandy qalasynyń Dostyq úıinde jurtshylyqpen kezdesý barysynda Elbasy aımaqtyń áleýmettik-ekonomıkalyq damýy boıynsha birqatar tapsyrmalar bergen bolatyn. «ArselorMıttal Temirtaý» basshylyǵy Prezıdentten jańa áleýmettik nysandar salý jáne JEO-2 jańǵyrtý boıynsha tapsyrma aldy. Kompanııanyń qarajatyna Temirtaýda emhana, dene shynyqtyrý-saýyqtyrý kesheni, balabaqsha salynýy tıis. Qaraǵandyda júzý basseıni men Oqýshylar saraıy salynýy kerek.
«Bul qala turǵyndaryna birinshi kezekte qajet nysandar. Elbasynyń tapsyrmalary jedel qarqynmen júzege asyrylýy tıis. Olardyń oryndalý barysy erekshe baqylaýda», - dep atap ótti Erlan Qoshanov.
Temirtaýda emhananyń qurylysyna jer tańdap qoıyldy. Ol áleýmettik qala aýdanynda 32-shi oramda - №4 mektep pen tramvaı parkiniń janynda.
Oblystyq densaýlyq saqtaý basqarmasy jetekshisiniń aıtýynsha, bul jer jaqsy tańdalǵan.
«Infraqurylymdar men basqa da qajettilikterge barynsha jaqsy keledi. Qalanyń bul bóliginde bizdiń nysandar joq. Turǵyndar úshin yńǵaıly bolady. Biz eseptep kórdik. Munda 15 000-nen 20 000-ǵa deıin adam qyzmetterdi paıdalanady, - dep atap ótti ol.
Emhana men sporttyq keshen daıyn joba boıynsha salynady. Aldaǵy ýaqytta kompanııa syzbalardy elektrondyq túrde alady.
«Mindet qoıyldy. Emhananyń qurylysyn osy jyly bastaımyz. Sport kesheni boıynsha jumystardy kelesi jyly bastaımyz dep oılaımyn», - dedi «ArselorMıttal Temirtaý» AQ atqarýshy dırektory Vadım Basın.
Ol JEO-2 jańǵyrtýy boıynsha kelisimshart ornatýǵa qadam jasalyp jatqanyn málimdedi. Atqarýshy dırektordyń aıtýynsha, jetinshi qazandyqtyń qurylysy boıynsha sheshim qabyldandy.
Qaraǵandydaǵy tapsyrmalardyń oryndalý qarqyny týraly qala ákimi Nurlan Áýbákirov málimdedi. Qarashada Oqýshylar saraıynyń qurylysyna baıqaý jarııalanady. Osy aptada joba boıynsha memlekettik saraptamanyń qorytyndysy keledi dep kútilýde. Júzý basseıni boıynsha JSQ kelesi jyly bastalady.
