Erlan Qoshanov Elbasy týraly zańnyń kúshin joıýǵa qatysty qujat qashan qabyldanatynyn aıtty

ASTANA. QazAqparat – Keler jyldyń basynda ótetin Parlament palatalarynyń birlesken otyrysynda Elbasy týraly zańnyń kúshin joıýǵa qatysty qujat qaralady. Bul týraly Májilis tóraǵasy Erlan Qoshanov aıtty, dep habarlaıdy QazAqparat tilshisi.

E. Qoshanov atalǵan zańnyń kúshin joıý máselesi Parlamentte 2023 jyldyń basynda qaralatynyn aıtty.

«Bul Konstıtýtsııalyq zań bolǵandyqtan, bul qujat Parlament palatalarynyń birlesken otyrysynda qaralady. Sondyqtan qańtar aıynda birlesken otyrysy ótip, bul másele qaralady. Atalǵan zań tolyq kúshin joıady», - dedi Erlan Qoshanov Májilistiń jalpy otyrysynan keıin tilshiler suraǵyna jaýap bere otyryp.

Onyń aıtýynsha, bul qujat boıynsha sheshim qabyldansa, zańdaǵy normalardyń barlyǵynynyń kúshi joıylady.

«Sol zańda kórsetilgen artyqshylyqtardyń barlyǵy kúshin joıady. Birinshi prezıdentke de, bolashaq prezıdentterge de eks-prezıdentke qatysty normalar birdeı qoldanylady. Eger zań kúshin josa, onda qarastyrylǵan ımmýnıtettiń zańdy kúshi bolmaıdy», - dedi Májilis tóraǵasy.

Búgin Parlament Elbasy týraly zańnyń kúshin joıýǵa qatysty qujatty qaraýǵa qabyldady.

Eske salsaq, jyl basynda Senat memlekettik bastamalardy Elbasymen kelisý qajettiligin joıýdy usyndy.

Sonymen qatar 2 aqpanda Parlament Elbasy týraly zańǵa túzetýdi qabyldady.

QR Ádilet mınıstri Qanat Mýsın Tuńǵysh Prezıdent týraly zańǵa túsinikteme berdi.

Foto: parlam.kz