Erlan Qoshanov Brest qamaly mýzeıine Hıýaz Dospanovanyń músinin syıǵa tartty

Forýmǵa Belarýs, Reseı, Ózbekstan, Mıanma, Qyrǵyzstan, Ázerbaıjan, Tájikstan, Vetnam, Serbııa, Venesýela, Kýba, Qytaı, Mońǵolııa jáne Laos elderiniń Parlament delegatsııalary men dıplomatııa ókilderi qatysty. Іs-shara 1941 jyldyń maýsymynda fashıstikGermanııanyń tutqıyldan jasaǵan shabýylyn alǵash bolyp qabyldaǵan Brest qalasynda ótti.

Forýmnyń jalpy otyrysynda sóılegen sózinde Erlan Qoshanov 22 maýsym — bul tek qana surapyl soǵystyń bastalǵan azaly kúni emes, sonymen birge tarıhty tereń zerdelep, sansyz qurbandyqtyń arqasynda keler urpaqqa beıbit ómir súrý quqyǵyn syılaǵan jandarǵa alǵys bildirý kúni ekenin atap ótti. Májilis spıkeri Ekigshi dúnıejúzilik soǵystyń alǵashqy ári eń aýyr shaıqasynyń biri — Brest qamalyn qorǵaǵan qazaqstandyq jaýyngerlerdiń erligine erekshe nazar aýdardy.

— Brest qamalyn Keńes Odaǵynyń túkpir-túkpirinen kelgen jaýyngerler qorǵady. Brest garnızonyndaǵy jeti myń áskerı qyzmetshiniń shamamen myńǵa jýyǵy Qazaqstannan kelgen sarbaz boldy. Olardyń barlyǵy derlik osy jerde qaza tapty. Búginde álem jańa syn-qaterlerge tap bolyp otyrǵan kezde bizdiń ortaq mindetimiz — tarıhı jadymyzdy saqtaý jáne ony jas urpaqqa jetkizý. Byltyr Astanada ótken áskerı paradta sóılegen sózinde Prezıdent Qasym-Jomart Toqaev soǵys týraly aqıqatty saqtaý mańyzdy ekenin atap ótti, óıtkeni shyndyqty bilmeıinshe beıbitshiliktiń baǵasyn túsiný múmkin emes. Ortaq erlikti este saqtaý — halyqtarymyz arasyndaǵy dostyqtyń, ózara qurmet pen yntymaqtastyqtyń eń berik irgetasy bolyp qala beredi, – dedi Erlan Qoshanov.

Ol óz sózinde Belarýs jerinde qaza tapqan otandastarymyzdyń esimin jańǵyrtý baǵytyndaǵy qazaqstandyq tarıhshylardyń eńbegin erekshe atap ótip, Brest qamalyn qorǵaǵan, esimderi búginge jetken batyrlardy atady.

Májilis tóraǵasy qazaq partızandarynyń erligine de jeke toqtaldy. 65 belarýs partızan brıgadalary men otrıadtarynyń quramynda 1,5 myńnan astam qazaq shaıqasqan. Solardyń biri — ańyzǵa aınalǵan partızan qolbasshy Ádı Sháripov, onyń esimi Mınskidegi kóshelerdiń birine berilgen.

— Tarıhshylardyń zertteýleri boıynsha, Belarýsti azat etý úshin bolǵan shaıqastarǵa 120 myńnan astam qazaqstandyq qatysqan. Olardyń árbir besinshisi osy jerde jerlengen. Belarýs jerinde kórsetken erligi men batyldyǵy úshin 84 qazaq jaýyngeri Keńes Odaǵynyń Batyry ataǵyna ıe boldy. Keńes Odaǵynyń Batyry Qazbek Nurjanov pen Súndetqalı Esqalıevtiń esimderi de Belarýs jerinde máńgi qurmetke bólengen. Biz qaza tapqan jerles batyrlarymyzdyń esimin ardaqtaǵan baýyrlas belarýs halqyna jáne el basshylyǵyna shyn júrekten alǵys bildiremiz, — dedi Erlan Qoshanov.

Májilis spıkeri Qazaqstannyń maıdandy munaı ónimderimen, janar-jaǵarmaı, kómirmen, qorǵasynmen, kıim-keshekpen, aıaq kıimmen jáne azyq-túlikpen qamtamasyz etýge qosqan zor úlesin de eske saldy. Sonymen qatar soǵys jyldary elimiz jarty mıllıonnan astam evakýatsııalanǵan azamattardy, sonyń ishinde Belarýstiń 110 myńnan astam turǵynyn qabyldady. Qazaq jerine 111 balalar úıi kóshirilip ákelindi, bul — soǵystan zardap shekken barlyq respýblıkalardan kelgen 13 myń bala. Erlan Qoshanov osy janashyrlyq pen yntymaq halyqtarymyzdyń eń mańyzdy adamı ónegesi ekenin atap ótti.

Sapar barysynda Májilis delegatsııasy Brest qamalynda ótken eske alý is-sharalaryna qatysty. Depýtattar «Qaharman Brest qamaly» memorıaldyq keshenine gúl shoqtaryn qoıdy. Brest qamaly garnızony zıratyndaǵy Estelik alleıada qazaqstandyq jaýyngerlerdi eske alyp, olardyń rýhyna taǵzym etti.

Brest qamalyn qorǵaý mýzeıine barǵan Erlan Qoshanov Májilis Parlamenti atynan mýzeıge Ekinshi dúnıejúzilik soǵystyń batyry, aty ańyzǵa aınalǵan qazaq ushqyshy — Hıýaz Dospanovanyń músinin syıǵa tartty. Hıýaz Dospanova áıgili 588-shi túngi bombalaýshy avıatsııa polkiniń («Túngi mystandar» retinde tanylǵan) quramynda Ońtústik maıdanda, Soltústik Kavkazda, Ýkraınada, Belarýste jáne Polshada áskerı is-qımyldarǵa qatysty. Bul eńbektiń avtory — músinshi Baqytbek Muhamedjanov. 

Aıta ketelik Belarýste soǵys ardagerlerine qansha qarajat berilgeni týraly jazǵan edik.