Erlan Qoshanov bıyl Parlamentte bolǵan mańyzdy oqıǵalar týraly aıtty
ASTANA. KAZINFORM — Búgin Májilis tóraǵasy Erlan Qoshanov osy jyldyń sońǵy jalpy otyrysynda Palatanyń jumysyn qorytyndylady.
- Búgin biz 2025 jyldyń qorytyndy jalpy otyrysyn ótkizdik. Bul jyl saıası jaǵynan da, zańnamalyq turǵydan da oqıǵalarǵa toly boldy. Jyl basynda el damýynyń strategııalyq baǵytyn aıqyndaǵan, aýqymdy saıası reformalardyń negizin qalaǵan mańyzdy qujat – Memleket basshysynyń tarıhı Joldaýynyń úsh jyldyǵy atap ótildi. Osy aıtýly oqıǵaǵa oraı biz arnaıy bir plenarlyq otyrys ótkizdik. Jıyn qorytyndysy boıynsha, elimizdiń barlyq azamatyn ortaq maqsatymyz – Ádiletti Qazaqstan qurý jolynda toptasýǵa shaqyratyn qarar qabyldandy. Sondaı-aq, jyl eldigimiz úshin mańyzy zor mereıtoılarǵa toly boldy. Qazaqstan Respýblıkasy Konstıtýtsııasynyń 30 jyldyǵyn atap óttik. Ol – táýelsizdik pen quqyqtyq tártiptiń irgetasyna aınalǵan negizgi zańymyz. Memleket basshysynyń tapsyrmasy boıynsha depýtattardyń bastamashylyǵymen Konstıtýtsııanyń 30 jyldyǵyna baılanysty raqymshylyq jasaý týraly zań qabyldandy. Ol izgiliktiń sımvolyna aınaldy deýge bolady. Elimizdegi 17 myńǵa jýyq sottalǵan adam osy raqymshylyq talaptaryna ilikti, - dedi E. Qoshanov Májilistiń jalpy otyrysynda.
Sonymen qatar ol ótken jyl Uly Otan soǵysyndaǵy halqymyzdyń erligin eske alýǵa arnalǵan aýqymdy is-sharalar bolǵanyn eske saldy. Bul tarıhı oqıǵa beıbit kúnniń baǵasyn tereń uǵyndyryp, surapyl soǵys jyldaryndaǵy qazaqstandyqtardyń eren erligi men qaısarlyǵyn taǵy da jadymyzda jańǵyrtty.
- Sonymen birge, jurtshylyqpen tikeleı dıalog ornatqan biregeı alań – Ulttyq Quryltaı jıyndary jalǵasyn tapty. Osy oraıda Prezıdenttiń Býrabaıda sóılegen sózi baǵdarlamalyq sıpatqa ıe boldy. Ol eldiń ishki saıasatyn damytýdyń strategııalyq baǵdaryn aıqyndap berdi... 2025 jyl syrtqy saıası belsendilik artyp, mańyzdy halyqaralyq bastamalar qarqyn alǵan kezeńge aınaldy. Prezıdent Býdapeshtte ótken Túrki memleketteri uıymynyń beıresmı sammıtine, sondaı-aq Qazaqstannyń álemdik arenadaǵy ustanymyn nyǵaıta túsetin basqa da mańyzdy halyqaralyq is-sharalarǵa qatysty. Budan bólek, jyl boıy Memleket basshysynyń strategııalyq mańyzdy saparlary men shetel basshylarynyń elimizge qarymta saparlary boldy. Prezıdenttiń bastamasymen Birikken Ulttar Uıymynyń Ortalyq Azııa men Aýǵanstanǵa arnalǵan ornyqty damý maqsattary jónindegi óńirlik ortalyǵynyń ashylýy aımaqtyń strategııalyq mańyzy artyp kele jatqanyn kórsetedi. Bul Qazaqstannyń jahandyq dıalogtyń belsendi jáne senimdi qatysýshysy retindegi rólin taǵy bir naqtylaı tústi. Sonymen qatar, parlamenttik dıplomatııa da qarqyndy damyp jatyr, - dedi Májilis tóraǵasy.
Erlan Qoshanov osy jyl Parlament Májilisi úshin de jemisti bolǵanyn atap ótti. Depýtattar Memleket basshysynyń Joldaýlarynda, Saılaýaldy baǵdarlamasynda, Ulttyq Quryltaıda bergen tapsyrmalary negizinde birqatar mańyzdy zańnamalyq aktilerdi qabyldady. Bıyl 100 zań qabyldandy, onyń 24-ine depýtattar bastamashy boldy.
- Sondaı-aq, elimizdiń negizgi qujattary – Sý, Bıýdjet, Salyq, Qurylys jáne Tsıfrlyq kodekster boıynsha jumysty aıaqtadyq. Olardyń árqaısysy qoǵamda qyzý talqylandy. Jekelegen normalar Parlament qabyrǵasynda, sarapshylar qoǵamdastyǵynda jan-jaqty pikirtalas týdyrdy, tipti syn da aıtyldy. Osy istiń nátıjesi retinde eldiń uzaq merzimdi múddelerine qyzmet etetin sheshimder qabyldanyp, Parlamenttiń ashyq ári tıimdi jumys istegenin atap ótýge bolady. Negizgi kodekster boıynsha jumysty aıaqtap, biz bolashaqtyń irgesin qalaıtyn zańnamaǵa kóshtik. «Jasandy ıntellekt týraly» jańa Zań qabyldandy. Qazaqstan Eýropalyq Odaqtan keıin osy salada jeke, arnaıy zańy bar ekinshi ıýrısdıktsııaǵa aınaldy, - dedi ol.
Buǵan deıin habarlanǵandaı, Erlan Qoshanov aýdan ákimderi úshin kásipkerlikti damytý boıynsha jeke KPI bekitý kerek ekenin aıtty.