Erlan Qoshanov Aqtóbedegi úleskerler máselesin qysqa merzimde sheshýdi tapsyrdy
ASTANA. KAZINFORM — Qazaqstan Halyq Keńesiniń tóraǵasy Erlan Qoshanov azamattardy jeke qabyldap, ótinishteri men usynystaryn tyńdady.
Qabyldaýda turǵyn úı máseleleri, boryshtyq júktemeni retteý, adal qaryz alýshylardy qoldaý, eńbek adamynyń mártebesin arttyrý, jastarǵa kásibı baǵdar berý, erekshe qajettilikteri bar balalardy tárbıelep otyrǵan otbasylardy qoldaý, alıment tóleý júıesin jetildirý jáne taǵy basqa da máseleler kóterildi.
— Atap aıtqanda, Aqtóbe oblysynyń turǵyny Jámıla Qylaýbaeva úleskerlerdiń quqyqtaryn buzǵan qurylys kompanııalar týraly aıtty. Ol zardap shekken 625 azamattyń sharttaryn tirkeý máselesin sheshýge járdemdesýdi surady. Erlan Qoshanov Aqtóbe oblysynyń ákimdigine Ónerkásip jáne qurylys mınıstrligimen birlesip, qajetti normatıvtik-quqyqtyq aktilerge jedel ózgerister engizip, kóterilgen máseleni qysqa merzimde sheshýdi tapsyrdy, — delingen habarlamada.
Azamattardyń naqty máselelerin sheshýmen qatar, qabyldaý barysynda qoǵamdyq mańyzy bar aýqymdy bastamalar da talqylandy.
Qabyldaý barysynda Ádilbek Saǵynaev eńbek adamyna qurmetpen qaraý mádenıetin qalyptastyrýǵa, mektep oqýshylaryna erte jastan kásibı baǵdar berýge jáne urpaqtar sabaqtastyǵyn nyǵaıtýǵa baǵyttalǵan keshendi baǵdarlama ázirleý jóninde bastama kóterdi.
Qazaqstan Halyq Keńesiniń tóraǵasy bul baǵyt Memleket basshysynyń turaqty nazarynda ekenin atap ótti. Prezıdent óz sózderinde eńbek adamynyń mártebesin arttyrý, óskeleń urpaqtyń boıyna eńbekqorlyq pen jaýapkershilik qundylyqtaryn sińirý, jastarǵa erte kásibı baǵdar berý jáne urpaqtar sabaqtastyǵyn nyǵaıtý máselelerin únemi kóterip kele jatqanyn jetkizdi.
Sondaı-aq bul máseleniń keshe ǵana Qazaqstan Halyq Keńesiniń otyrysynda da talqylanǵanyn atap ótip, Qazaqstan Halyq Keńesi tóraǵasynyń orynbasary Lázzat Shyńǵysbaevanyń jetekshiligimen osy baǵyttaǵy jumysty úılestirý úshin vedomstvoaralyq jumys tobyn qurý týraly sheshim qabyldanǵanyn habarlady.
Sonymen qatar qabyldaý barysynda múgedektigi bar balalardy tárbıelep otyrǵan otbasylardy keshendi qoldaýǵa baǵyttalǵan pılottyq baǵdarlamany iske asyrý máselesi talqylandy. Bul bastamany kótergen Ásııa Tıkeeva otbasylarǵa psıhologııalyq kómek kórsetýdiń, analardyń kásipkerlik bastamalaryn qoldap, granttar bólýdiń, sondaı-aq úkimettik emes uıymdar bazasynda óńirlik qoldaý ortalyqtaryn ashýdyń mańyzdylyǵyna toqtaldy.
Osy jóninde Erlan Qoshanov Qazaqstan Halyq Keńesiniń múshesi Qaltaeva Lázzat jetekshilik etetin «Áleýmettik saıasat jónindegi komıssııa» komıssııada qaraý qajettigine toqtaldy. Tıisti sala mınıstrlikteri de máseleni nazarǵa alatyndaryn jetkizdi.
Qabyldaý barysynda Ábdildın Aslan «Bala qory» alımentterdi aldyn ala tóleý qoryn qurý jónindegi bastamasyn usynyp, otbasy jáne jastar saıasaty salasyndaǵy alty joba boıynsha memlekettik organdarǵa naqty usynymdar ázirleý qajettigin atap ótti. Atalǵan usynystar qoldanystaǵy zańnama talaptaryna sáıkes qaralyp, kóterilgen máseleler men bastamalar jan-jaqty zerdelenetin bolady.
Áleýmettik bastamalarmen qatar, qabyldaý barysynda qalalyq ınfraqurylymdy damytý máseleleri de kóterildi. Astana qalasynyń turǵyny Nabıýllına Qarlyǵash Kırpıchnyı turǵyn alabynda dene shynyqtyrý-saýyqtyrý keshenin, memlekettik balabaqsha men beıimdeý ortalyǵyn salý máselesin kóterdi. Óz kezeginde Astana qalasy ákiminiń birinshi orynbasary Nurlan Núrkenov atalǵan nysandardyń qurylysy 2027 jylǵa arnalǵan josparda qarastyrylǵanyn jetkizdi.
Qoǵamdyq qabyldaý barysynda budan bólek, birqatar turǵynnyń usynys-pikirleri men ótinishteri tyńdalyp, ózekti máseleleri talqylandy. Árbir ótinish boıynsha tıisti túsiniktemeler berilip, kóterilgen bastamalar nazarǵa alyndy. Turǵyndardyń usynystary jan-jaqty zerdelenip, quzyrly memlekettik organdarmen birlesip, zańnama aıasynda sheshý joldary qarastyrylatyn bolady.
Osydan buryn Erlan Qoshanov Aqmola oblysyna jumys sapary barysynda qoǵam ókilderimen kezdesip, Prezıdent Joldaýyndaǵy ekonomıkalyq, áleýmettik jáne tsıfrlyq damý basymdyqtaryn talqylady.