Erlan Qoshanov AES qurylysy týraly: 2050 jylǵa qaraı jahandyq ıadrolyq energııa úsh ese artady
ASTANA. KAZINFORM – QR Parlamenti |Májilisiniń tóraǵasy Erlan Qoshanov Atom elektr stantsııasyn salýdy qoldaý jónindegi Halyqtyq shtab ókilderiniń Atyraý oblysynyń turǵyndarymen kezdesýine qatysty oıyn bildirdi.
«Qadirli dostar! Búgin Atom elektr stantsııasyn salýdy qoldaý jónindegi Halyqtyq shtab Atyraý oblysynyń turǵyndarymen kezdesti. Ǵalymdarmen, jylý elektr stantsııasy jumysshylarymen, óndiris qyzmetkerlerimen, munaı-gaz jáne hımııa ónerkásibi salasynyń ókilderimen kezdesýlerde olardyń beıbit atom ıdeıasyn belsendi qoldaıtynyn baıqadyq. Óńirdegi ǵylym salasy ókilderi atom elektr stantsııalaryn salý elimizdiń ǵylymı áleýetin arttyrýǵa qolaıly jaǵdaı jasaıtynyn aıtyp otyr. Sondyqtan olar Memleket basshysynyń beıbit atomdy damytý jónindegi progressıvti ıdeıasyn tolyǵymen qoldaıdy. Álemde AES energııasy ǵylymı-tehnıkalyq progrestiń kilti bolyp sanalady. 2050 jylǵa qaraı jahandyq ıadrolyq energııa úsh ese artady. Al bizdiń ǵalymdar Qazaqstannyń bul múmkindikti jiberip alyp, álemdik progresten artta qalmaýy qajettigin aıtty»,-dep jazdy Májilis tóraǵasy óziniń Facebook paraqshasynda.
Onyń sózinshe, atom elektr stantsııasynyń basty mindeti – búkil Qazaqstandy úzdiksiz energııamen qamtamasyz etý. Shtab múshelerimen kezdesýde Atyraý jylý elektr ortalyǵynyń jumysshylary bul máseleniń ózektiligine basa mán beretinin jetkizdi. Búgingi tańda Atyraý oblysy Reseıdiń elektr qýatyna táýeldi. Bul baǵa jaǵynan qymbatqa túsedi, sonymen qatar aımaqtaǵy óndiriske keri áserin tıgizedi.
Óńirdegi munaı-gaz jáne hımııa ónerkásibi salasynyń ókilderi men ónerkásiptik kásiporyndardyń jumysshylary senimdi ári turaqty energııa kóziniń qajettiligin kórip otyr. Joǵary tehnologııaly óndiristerdi damytý úshin munaıly ólke retinde Atyraýdyń áleýeti zor. Degenmen energııa tapshylyǵy búginde kásiporyndarǵa jańa tehnologııalardy iske qosýǵa múmkindik bermeı, olardy jańǵyrtýǵa kedergi keltirýde. Kásipkerler men mamandar beıbit atom óńirge tyń serpin berip, iri mańyzdy jobalardy júzege asyrýǵa jol ashatynyna senimdi.
«6 qazan kúni elimizdiń damý baǵdaryn bárimiz birigip anyqtaıtyn bolamyz. Bul kúni qazaqstandyqtardyń basym bóligi órleý jolyn, elimizdiń energetıkalyq táýelsizdigin tańdap, Atom elektr stantsııasyn qoldap daýys beretinine senimdimin!»,-dep jazdy E.Qoshanov.
