Erlan Qarın júrgizýshiden birneshe qujatty talap etpeıtin zań jobasyna qatysty pikir bildirdi
«Búgin Májiliske «Qazaqstan Respýblıkasynyń keıbir zańnamalyq aktilerine jol qozǵalysy máseleleri boıynsha ózgerister men tolyqtyrýlar engizý týraly» zań jobasy kelip tústi. Ony Іshki ister mınıstrligi Memleket basshysynyń tapsyrmasy boıynsha Ulttyq senim keńesi aıasynda ázirledi. 2019 jyldyń jeltoqsanynda Ulttyq keńestiń ekinshi otyrysynda Prezıdent Qasym-Jomart Toqaev kólik júrgizýshilerin úıde keıbir qujatty umytyp ketkeni úshin jazalaýdy toqtatý týraly buıryq berdi. Ózderińiz biletindeı, qazir júrgizýshiler ózimen birneshe qujatty, atap aıtqanda jeke kýálik, kólik júrgizý kýáligin, tirkeý kýáligi, tehnıkalyq jáne saqtandyrý qujatyn alyp júrýi tıis. Prezıdent qaǵaz qujattardyń sanyn azaıtyp, barlyq derekterdi biriktirýdi usyndy. Úkimetke osy máselelerdiń barlyǵyn pysyqtaýdy tapsyrdy. Nátıjesinde tıisti zań jobasy ázirlendi», - dep jazady Erlan Qarın.
Endigi kezekte jańa normalarǵa sáıkes avtokólikpen júrgen kezde tek bir ǵana qujat – jeke kýálik nemese júrgizýshi kýáligi talap etiledi.
«Qazirgi ýaqytta respýblıkada 4,2 mıllıonǵa jýyq kólik tirkelgen. Árbir úshinshi azamat kólik basqarýǵa quqyly. Sondyqtan bul normalardyń qabyldanýy halyqtyń edáýir bóligin qamtıdy», - degen Erlan Qarın áleýmettik jeli arqyly Prezıdenttiń 2019 jylǵy 20 jeltoqsandaǵy Ulttyq keńestiń ekinshi otyrysynda sóılegen sóziniń vıdeosyn jarııalady.
Eske sala ketsek keshe Májiliste «Qazaqstan Respýblıkasynyń keıbir zańnamalyq aktilerine jol júrisi máseleleri boıynsha ózgerister men tolyqtyrýlar engizý týraly» QR zańynyń jobasy boıynsha qorytyndy ázirleıtini habarlanǵan bolatyn.
«Zań jobasy júrgizýshiniń júrgizýshi kýáligi men Qazaqstan Respýblıkasynda berilgen kólik quraly tirkeý kýáligin ózimen birge alyp júrýdi mindetteıtin normany buzǵany úshin ákimshilik jaýapkershilikti alyp tastaýdy, sondaı-aq kólik quraldarynyń keıbir túrlerin paıdalaný tártibin retteýge baǵyttalǵan. Komıtet atalǵan zań jobasyn jumysqa alýǵa jáne ol boıynsha 2021 jylǵy 26 qarashaǵa deıin qorytyndy ázirleýge daıyn», - dedi Májilis depýtaty.
