Erlan Qarın Joldaý týraly: Jalpyulttyq birlikti bekite túsý men júıeli reformany jalǵastyrýǵa arnaldy

NUR-SULTAN. QazAqparat – QR Prezıdentiniń keńesshisi Erlan Qarın Prezıdent Qasym-Jomart Toqaevtyń Qazaqstan halqyna kezekti Joldaýyna qatysty pikir bildirdi, dep habarlaıdy QazAqparat tilshisi.

«Jalpyulttyq birlikti bekite túsý men júıeli reformany odan ári jalǵastyra túsý Prezıdenttiń bıylǵy Joldaýynda ózekti oryn aldy. Memleket basshysy bul joly da osyǵan deıingi Joldaýynda qozǵalǵan saıası reformalarǵa basymdyq berdi. Naqty aıtqanda, ol Qazaqstannyń saıası reformasynyń 4-i paketin usynyp otyr. Tolyǵyraq toqtalsaq, depýtattyq mandatty bólgende 30 paıyz kvotany áıelder men jastarǵa teńdeı bólýdi zańmen bekitý mindetin qoıdy. Buryn bul talap tek partııa atynan saılanǵan depýtattarǵa qatysty bolǵan. Endigi ýaqytta talap depýtattyq mandatty taǵaıyndaý kezinde de eskeriletin bolady. Sondaı-aq, Memleket basshysy partııa atynan saılaýǵa túsetin kandıdattardyń qatarynda erekshe kútimdi talap etetin jandardyń bolýyn usyndy», - dep jazdy Erlan Qarın Telegram kanalynda.

Onyń aıtýynsha, Memleket basshysy júktegen jańa mindetter men tapsyrmalardy oryndaýda memlekettik apparat pen qoǵam birlesip áreket etkeni jón.

«Sonymen qatar, Joldaýda Prezıdent aýyl turǵyndarynyń azamattyq bastamasyna qoldaý kórsetýdiń tıimdi mehanızmin ázirleýdi tapsyrdy. Sol sııaqty áıelderdiń qoǵamdaǵy saıası jáne ekonomıkalyq pozıtsııasyn barynsha qoldap, qamtý. Odan bólek, Memleket basshysy adam quqyǵy máselesine erekshe toqtalyp ótti. Bul baǵytta memleket qylmystyq protsess, polıtsııa qyzmeti modelin keńeıtý, quqyq qorǵaýshylardyń da quqyǵyn qorǵaý máselesine asa mán berýi tıis. Adam quqyǵy salasyndaǵy ózekti máselerdiń qatarynda balalarǵa kórsetiletin zorlyq-zombylyqty joıý men sıntetıkalyq esirkimen kúreste jatady», - deıdi ol.