Erlan Qarın: Jer qatynastary máselesi Ulttyq keńestiń kún tártibinde basty orynda

NUR-SULTAN. QazAqparat – Jer qatynastary máselesi Ulttyq qoǵamdyq senim keńesiniń kún tártibinde basty oryndardyń birinde. Bul týraly QR Prezıdentiniń kómekshisi Erlan Qarın Telegram paraqshasynda jazdy, dep habarlaıdy QazAqparat tilshisi.

«2021 jyly 25 aqpanda Ulttyq qoǵamdyq senim keńesinniń besinshi otyrysynda Memleket basshysy aýylsharýashylyq maqsatyndaǵy jerlerdi sheteldikterge jáne sheteldik zańdy tulǵalarǵa satýǵa jáne jalǵa berýge tyıym salýdy zańmen bekitýdi tapsyrdy. Sonymen birge, Qasym-Jomart Toqaev Prezıdenttiń zańnamalyq bastamasy aıasynda zań jobasyn daıyndaý qajettiligine nazar aýdardy. Ulttyq keńes otyrysynan keıin Prezıdent Ákimshiligi birden tıisti jumystardy bastady. Zań jobasy tezirek daıyndalyp, maquldandy», - dep jazdy Erlan Qarın.

Ol osynyń nátıjesinde keshe Qazaqstan Respýblıkasy Konstıtýtsııasynyń 61-babynyń 1-tarmaǵyna sáıkes Memleket basshysy Qazaqstan Respýblıkasy Parlamenti Májilisine jerdi sheteldikterge satýǵa jáne jalǵa berýge tyıym salýdy qarastyratyn «Qazaqstan Respýblıkasynyń keıbir zańnamalyq aktilerine jer qatynastary máseleleri boıynsha ózgerister men tolyqtyrýlar engizý týraly» Qazaqstan Respýblıkasy zańynyń jobasyn joldaǵanyn aıtty.

«Jer qatynastary máseleleri Ulttyq keńestiń alǵashqy jumys kúninen bastap kún tártibindegi basty orynnyń birin ıelengenin atap ótken jón. Sondyqtan, Prezıdenttiń aýylsharýashylyq jerlerin sheteldikterge satýǵa jáne jalǵa berýge tyıym salý týraly sheshimi UQSK alańynda jarııalandy. Bul taǵy da osy dıalog alańynyń ózektiligi men tıimdiligin kórsetedi», - dedi ol.

Eske sala ketsek, buǵan deıin Memleket basshysy Qasym-Jomart Toqaev jerdi sheteldikterge satýǵa birjola tyıym salýdy kózdeıtin zań jobasyn Májiliske joldaǵan edi.