Erlan Qarın: Jańartylǵan Konstıtýtsııa — ulttyń jańa sapasyn qalyptastyrý joly

ASTANA. KAZINFORM — QR Memlekettik keńesshisi Erlan Qarın Konstıtýtsııalyq reformanyń nátıjeleri týraly aıtty.

Erlan Qarın atap ótkendeı, osydan týra úsh jyl buryn elimizde jalpyulttyq referendým ótip, azamattarymyzdyń kópshiligi Konstıtýtsııany jańartý týraly bastamany qoldady. Sonyń nátıjesinde Ata Zańymyzdyń úshten biri ózgerdi.

— Konstıtýtsııalyq reforma Prezıdent Qasym-Jomart Toqaevtyń eldi jan-jaqty jańǵyrtýǵa arnalǵan strategııalyq baǵdaryn júzege asyrýǵa berik ınstıtýtsıonaldyq negiz qalady. Atap aıtqanda, Májilis pen máslıhat depýtattaryn saılaýdyń aralas júıesi engizildi, áıelder men jastarǵa 30% kvota belgilendi, partııalardy tirkeý rásimi jeńildetildi. Prezıdent ókilettiginiń jeti jyldyq bir ǵana merzimmen shektelýi mańyzdy jańalyqtyń biri boldy. Konstıtýtsııalyq Sot qurylyp, adam quqyqtaryn qorǵaý tásilderi kúsheıtildi. Ata zańǵa jer jáne onyń qoınaýy halyqqa tıesili degen norma engizildi. «Ulttyq qor — balalarǵa» jobasy osy erejeniń is júzindegi naqty kórinisine aınaldy. Oǵan sáıkes Qazaqstandaǵy barlyq balanyń esepshotyna Ulttyq qor tabysynan qarjy aýdaryla bastady, — dedi Qarın.

Onyń sózinshe, konstıtýtsııalyq reforma Qazaqstanda múlde jańa saıası jaǵdaı qalyptastyrýmen qatar, búkil aımaǵymyz úshin jańa úrdiske jol ashty. 

— Elimizdiń saıası júıesin jetildirý úderisi áli de jalǵasyp jatyr. Aýyl ákimderin tikeleı saılaý tásili engizilgennen beri olardyń quramy tolyq jańardy. Bıyldan bastap aýdan jáne oblystyq mańyzy bar qala ákimderi de tikeleı saılanady. Jalpy alǵanda, elimizde jyl saıyn júzdegen saılaý naýqany ótedi. Bul úderis eldegi qoǵamdyq-saıası ómirdiń kúndelikti kórinisine aınaldy.  Eń bastysy, reformalardyń nátıjesinde elde jańa saıası mádenıet qalyptasyp, azamattarymyzdyń qundylyqtar júıesi jańǵyryp jatyr. Osylaısha, jańartylǵan Konstıtýtsııa ulttyń jańa sapasyn qalyptastyratyn túbegeıli ózgeristerdi bastap berdi, — dep túıindedi memlekettik keńesshi.

Osyǵan deıin memlekettik keńesshi Erlan Qarın «Ortalyq Azııa — Qytaı: aımaqtyq áriptestiktiń jańa kókjıekteri» atty taldaý ortalyqtary V forýmynyń ashylýyna qatysqanyn jazǵanbyz.