Erlan Qarın: Jańarǵan Ata zań memleketimizdiń damýyna zor yqpal etti

ASTANA. KAZINFORM – Jańarǵan Ata zań memleketimizdiń damýyna zor yqpal etti, dep málimdedi Memlekettik keńesshi Erlan Qarın.

«Búgin elimiz Konstıtýtsııa kúnin atap ótip jatyr. 2022 jyly Ata zańǵa mańyzdy ózgerister engizildi. Ádildik qaǵıdatyna negizdelgen bul túzetýler búkil qoǵamnyń múddesin eskere otyryp, azamattardyń quqyqtary men bostandyqtaryn keńeıte túsýge jol ashty. Konstıtýtsııalyq reformanyń basty jańalyǵy – Prezıdent jeti jyldyq merzimge bir ret qana saılanatyn boldy, Parlamenttiń yqpaly kúsheıdi. Májilis pen máslıhat depýtattaryn saılaýǵa qatysty aralas saılaý júıesi engizildi. Jańa ınstıtýt – Konstıtýtsııalyq Sot quryldy, adam quqyqtaryn qorǵaý tetikteri aıtarlyqtaı kúsheıtildi», - dedi Erlan Qarın.

Onyń aıtýynsha, reformanyń nátıjesinde búkil saıası júıeniń jumysy jańǵyrtyldy, elimizde aýqymdy ári tereń ınstıtýtsıonaldyq ózgerister jasaldy.

«2022 jylǵy konstıtýtsııalyq reformadan týyndaıtyn negizgi bastamanyń biri retinde «Ulttyq qor – balalarǵa» jobasyn atap ótýge bolady. Jalpy, osy ózgeristerden keıin eki jyl ótti. Búginde biz jańarǵan Ata zań memleketimizdiń damýyna zor yqpal etti dep nyq senimmen aıta alamyz», - dedi Memlekettik keńesshi.