Erlan Qarın: Jańa zań memlekettik basqarýǵa halyqtyń tikeleı qatysýyn qamtamasyz etedi

NUR-SULTAN. QazAqparat - Búgin Memleket basshysy Qasym-Jomart Toqaev «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» zańǵa qol qoıdy. Bul – óte mańyzdy qujat.

Bul týraly QR Prezıdentiniń keńesshisi Erlan Qarın óziniń Facebook paraqshasynda jazdy, dep habarlaıdy QazAqparat.

Onyń sózinshe, endi, elimizdegi saılaý júıesi jańa talaptar boıynsha jumys isteıdi. Aýdandyq deńgeıdegi qalalardyń, aýyldardyń, kentterdiń jáne aýyldyq okrýgterdiń ákimderin saılaý – jergilikti jerdegi memlekettik basqarýǵa halyqtyń tikeleı qatysýyn qamtamasyz etý jolynda jasalǵan biregeı qadam. Bıyl osy zań boıynsha 800-den astam eldi-mekende ákimder saılaýy ótedi.

Sonymen birge, saıası partııalardyń Parlament pen máslıhatqa ótýine qoıylǵan 7 paıyzdyq shek 5 paıyzǵa deıin tómendetildi. Atalǵan sheshim saıası básekeni kúsheıtip, saılaý úderisine tyń serpin bereri sózsiz.

Oǵan qosa, budan bylaı saılaý bıýlletenderine «bárine qarsy» degen baǵan engiziledi. Bul saılaýshylardyń tańdaý quqyǵyn tolyq júzege asyrýǵa múmkindik beredi.

«Osylaısha, Prezıdenttiń bastamasymen qolǵa alynǵan saıası reformalardyń birinshi, ekinshi jáne úshinshi toptamasynda kózdelgen negizgi usynystar zań normalaryna aınalyp, iske asty. Munyń bári Ulttyq qoǵamdyq senim keńesi aıasynda kóterilip, pysyqtalǵanyn bilesizder.

Shyn máninde, bul – Memleket basshysy basa mán berip otyrǵan Qazaqstandaǵy saıası dıalogtyń naqty jemisi»,-dep jazdy Erlan Qarın.