Memleketimiz barda tilimiz eshqashan tuǵyrdan túspeıdi. Memleketti saqtaýymyz, eldiń birligin oılaýymyz kerek — Erlan Qarın

ASTANA. KAZINFORM — Memlekettik keńesshi Erlan Qarın jańa Konstıtýtsııa jobasynda memlekettik tilge laıyqty mártebe berilgenin aıtty. 

— Jańa Konstıtýtsııada memlekettik til qazaq tili ekeni taıǵa tańba basqandaı naqty jazylǵan, aıqyn bekitilgen. Atap aıtqanda, jańa Konstıtýtsııanyń jańa jobasynda «Konstıtýtsııalyq qurylys negizderi» dep atalatyn 1-bólimniń 9-babynyń 1-tarmaǵynda Qazaqstan Respýblıkasynyń memlekettik tili — qazaq tili dep tikeleı belgilengen, anyq kórsetilgen. Bizde memlekettik til bireý. Ol — qazaq tili. Basqa memlekettik joq, — dedi ol.

Erlan Qarın qazaq tili bıik tuǵyrda, óz ornynda ekenine senim bildirdi.

— Memleketimiz barda qazaq tili eshqashan ol tuǵyrdan túspeıdi. Demek sol úshin, eń bastysy memleketti saqtaý kerek, memleketti qorǵaý kerek, eń birinshi, el birligin oılaý kerek, — dedi Memlekettik keńesshi.

Aıta ketý kerek, ótken apta aıaǵynda jarııalanǵan jańa Konstıtýtsııanyń jobasynda memlekettik tildiń mártebesi týraly norma 9-bapta ornalasqan. Ol jerde memlekettik til — qazaq tili ekeni, al memlekettik mekemeler men ózin-ózi basqarý uıymdarynda orys tili memlekettik tilmen qatar qoldanylatyny aıtylǵan.