Erlan Qarın jańa Konstıtýtsııa jobasyndaǵy egemendik pen táýelsizdik uǵymdarynyń ornyna toqtaldy

ASTANA. KAZINFORM – Memlekettik keńesshi Erlan Qarın jańa Konstıtýtsııa jobasyndaǵy egemendik pen táýelsizdik uǵymdarynyń ornyna toqtaldy.

- Jańa Konstıtýtsııada táýelsizdik, egemendik, memlekettilik, aýmaqtyq tutastyq sekildi uǵymdar memlekettiń basty qundylyǵy, negizgi basymdyǵy retinde aıqyndalyp, ornyqqan. Ony jańa preambýladan anyq ańǵarýǵa bolady. Sondaı-aq, keıbir normalarda dáıekti túrde belgilenedi.

Qoldanystaǵy 1995 jylǵy Konstıtýtsııada táýelsizdik degen sóz eki ret atalady. Sol sııaqty egemendik sózi de eki ret atalady. Qazir qoǵam talqylaýyna usynyp otyrǵan jańa Ata zańnyń jobasynda táýelsizdik, egemendik uǵymdary 6 ret atalady. Ne úshin? Sebebi, basynan aıaǵyna deıin táýelsizdik, egemendik uǵymdary – negizgi, fýndamentaldy uǵymdar, - dedi ol.

Memlekettik keńesshi bul sózine naqty normalardy mysal etip keltirdi.

- Atap aıtqanda, 2-baptyń 6-tarmaǵynda Qazaqstan Respýblıkasynyń táýelsizdigi ózgermeıdi dep naqty tujyrym jasalǵan. 3-baptyń 1-tarmaǵyndaǵy Qazaqstan Respýblıkasy qyzmetiniń negizin quraýshy qaǵıdattary eń aldymen egemendik pen táýelsizdikti qorǵaý dep bastalady. Nyǵaıtý, damytý emes, egemendik pen táýelsizdikti qorǵaý dep bastalady, - dedi Erlan Qarın.

Aıta ketý kerek, ótken apta aıaǵynda jarııalanǵan jańa Konstıtýtsııanyń jobasynda memlekettik tildiń mártebesi týraly norma 9-bapta ornalasqan. Ol jerde memlekettik til – qazaq tili ekeni, al memlekettik mekemeler men ózin-ózi basqarý uıymdarynda orys tili memlekettik tilmen qatar qoldanylatyny aıtylǵan.