Erlan Qarın: Jańa Konstıtýtsııa tek quqyqtyq qujat emes
QOSTANAI. KAZINFORM – Memlekettik keńesshi Erlan Qarın «Ádiletti jáne progressıvti Qazaqstannyń halyqtyq Konstıtýtsııasy úshin» jalpyulttyq koalıtsııasynyń múshelerimen birge Qostanaı oblysyna jumys saparymen baryp, óńir jurtshylyǵymen birqatar kezdesý ótkizdi.
Memlekettik keńesshimen birge óńirge Jalpyulttyq koalıtsııanyń músheleri, Parlament Májilisiniń depýtattary Snejanna Imasheva, Erkin Ábil, Aıdarbek Qojanazarov, Qazaqstan halqy Assambleıasy tóraǵasynyń orynbasary Marat Ázilhanov, Prezıdent Teleradıokesheniniń dırektory Raýshan Qajybaeva, prodıýser Almas Jalı jáne Uni-Q Group medıaholdınginiń bas dırektory Muhamedqalı Taýan bardy.
Sapar etnomádenı birlestikter ókilderimen kezdesýden bastaldy. Erlan Qarın jańa Konstıtýtsııa tek quqyqtyq qujat emes, sonymen qatar múddeler teńgerimin, yntymaqtastyqty, ózara qurmetti jáne el bolashaǵyna ortaq jaýapkershilik qundylyqtaryn bekitetin qoǵamdyq kelisim ekenin atap ótti. Ol «Birligimiz – áralýandyqta» qaǵıdaty qoǵam tutastyǵyn nyǵaıtatynyn aıtty.
Májilis depýtattary Snejanna Imasheva men Erkin Ábil ınstıtýtsıonaldyq jańǵyrtý tetikteri jáne derbestikti qorǵaý máseleleri jóninde pikir bildirdi. Olardyń aıtýynsha, usynylyp otyrǵan ózgerister azamattardyń sheshim qabyldaýǵa qatysýyn kúsheıtip, memleket pen qoǵam arasyndaǵy ózara is-qımyldyń áleýmettik ádiletti modelin qalyptastyrady.
Qazaqstan halqy Assambleıasy tóraǵasynyń orynbasary Marat Ázilhanov pen etnomádenı birlestikter ókilderi Halyq Keńesiniń etnosaralyq jáne konfessııaaralyq dıalog alańy retindegi, teń múmkindikterdi qoldaý jáne qoǵamdyq kelisimdi nyǵaıtýdaǵy rólin atap ótti.
Sapar barysyndaǵy negizgi is-shara oblys aktıvimen kezdesý boldy. Oǵan shamamen 300 adam qatysty. Olardyń qatarynda qoǵam qaıratkerleri, dıqandar, ónerkásip mamandary, áleýmettik sala qyzmetkerleri, ǵylymı jáne shyǵarmashylyq zııaly qaýym ókilderi, sportshylar jáne jastar boldy.
Erlan Qarın Konstıtýtsııa jobasyn ázirleý barysyna jan-jaqty toqtaldy. Onyń aıtýynsha, referendým jańa Konstıtýtsııa jobasyn jarty jyldan astam ýaqyt boıy keń kólemde qoǵamdyq talqylaýdyń zańdy qorytyndysyna aınalady. Jańa Ata Zań memleket pen qoǵamnyń ózara tıimdi is-qımylyna negizdelgen memlekettik-saıası qurylystyń zamanaýı modeline túbegeıli kóshýdi bildiredi.
Májilis depýtattary Snejanna Imasheva men Aıdarbek Qojanazarov joba bılik ınstıtýttarynyń ókilettikteri men jaýapkershiligi arasyndaǵy tepe-teńdikti bekitetinin, sondaı-aq ekonomıkany, ınnovatsııalardy damytýǵa jáne ınvestıtsııalar tartýǵa jaǵdaı jasaıtynyn atap ótti.
Qostanaı avtomobıl kóligi kolledjiniń dırektory Dmıtrıı Pavlenko eńbek, bilim, ǵylym jáne ınnovatsııa qundylyqtarynyń bekitilýi jastardyń kásibı turǵyda ósýine jáne zamanaýı ekonomıkanyń damýyna berik negiz qalaıtynyn aıtty.
Sapar aıasynda delegatsııa «Agromash» jáne «Allur» zaýyttarynyń jas mamandarymen kezdesti. Erlan Qarın adamı kapıtaldyń, bilim men ǵylymnyń jáne azamattardyń eńbektegi jetistikteriniń basymdyǵyna toqtaldy. Koalıtsııa músheleri joba áleýmettik ádildikti kúsheıtýge, jumyspen qamtýdy qoldaýǵa jáne kásipkerlikti damytýǵa baǵyttalǵanyn málimdedi. Jas mamandar Konstıtýtsııany sala úshin turaqty jaǵdaı qalyptastyratyn ári kásibı damýǵa múmkindik beretin mańyzdy qujat retinde baǵalaıtyndaryn jetkizdi.
Sondaı-aq óńirde kreatıvti jastar ókilderimen kezdesý ótti. Onda bilim, ǵylym, mádenıet jáne ınnovatsııalardy memlekettiń strategııalyq basymdyǵy retinde bekitý, zııatkerlik menshikti quqyqtyq qorǵaý máseleleri talqylandy.
Jalpy, Qostanaı oblysyndaǵy kezdesýler qoǵamnyń 2026 jylǵy 15 naýryzda ótetin referendýmǵa joǵary qyzyǵýshylyq tanytyp otyrǵanyn kórsetti.
Aıta keteıik, Aqtóbede referendýmdy qoldaýǵa arnalǵan jastar festıvali ótti.