Erlan Qarın: Jańa qoǵamdyq etıkany qalyptastyrý – el damýynyń mańyzdy sharty
ASTANA. KAZINFORM – Prezıdent Ákimshiligi basshysynyń birinshi orynbasary Erlan Qarın jańa qoǵamdyq etıkany qalyptastyrý ulttyń damýy men órkendeýiniń negizgi alǵysharttarynyń biri ekenin aıtty.
Onyń aıtýynsha, ishki mádenıeti men berik adamgershilik ustanymdary qalyptasqan qoǵam ǵana qazirgi zamannyń san alýan syn-qaterine tótep bere alady. Sondyqtan Memleket basshysy Qasym-Jomart Toqaev bul máselege aıryqsha mán berip keledi.
– Ózin-ózi ustaý mádenıetin, jańa qoǵamdyq etıka qaǵıdattaryn qalyptastyrý – ultymyzdyń damýy men órkendeýiniń negizgi alǵysharttarynyń biri. Іshki mádenıeti men berik adamgershilik ustanymdary qalyptasqan qoǵam ǵana qazirgi zamannyń san alýan syn-qaterine tótep bere alady. Memleket basshysy Qasym-Jomart Toqaev bul máseleniń mańyzyn tereń túsinedi. Sondyqtan da, ol osy baǵytqa aıryqsha mán berip keledi, – dedi Erlan Qarın.
Ol qazirgi kezde qoǵamdaǵy daý-damaılardyń kópshiligi azamattardyń mádenıetsizdiginen, daraqylyǵy men ádepsizdiginen týyndaıtynyn atap ótti.
– Qoǵamdaǵy kez kelgen kıkiljińniń ıa daýdyń aldyn alýdyń birden bir joly – jeke bastyń mádenıetin damytý. Bul – bir-birimizge syılastyqpen qaraý, óz isimizge adal bolý, zańdy qurmetteý, tazalyq pen tártipti saqtaý, – dedi ol.
Erlan Qarın ult sapasyn arttyrý, azamattardyń minez-qulqyn ózgertý jáne jańa ádetterdi qalyptastyrý uzaq ýaqytty qajet etetinin aıtty.
– Ult sapasyn arttyrý, azamattardyń minez-qulqyn ózgertý, jańa ádetterdi qalyptastyrý bir kúndik sharýa emes ekeni belgili. Ári mundaı ózgeriske jyltyraq ıdeologııamen qol jetkizý múmkin emes. Sol sebepti, qazir jalań úgit-nasıhatpen emes, naqty istermen aınalysý tıimdi, – dedi Prezıdent Ákimshiligi basshysynyń birinshi orynbasary.
Onyń aıtýynsha, osy maqsatta Memleket basshysynyń tapsyrmasymen kezeń-kezeńimen júıeli jumys júrgizilip keledi. Atap aıtqanda, mektepterde «Adal azamat» birtutas tárbıe baǵdarlamasy engizildi, vandalızmge qarsy zań qabyldandy, tabıǵı nysandardy qorǵaý talaptary kúsheıtildi, qoǵamdyq oryndarda betti tumshalap júrýge qatysty zańnamalyq norma engizildi, kóshede beıádep sóz aıtýǵa tyıym salyndy, tazalyq pen tártipti saqtaýǵa basymdyq berildi, jol qozǵalysy erejelerine qoıylatyn talaptar kúsheıtildi, sondaı-aq áleýmettik jelilerde azamattardyń ar-namysy men qadir-qasıetin qorlaǵany úshin jaýapkershilik qarastyryldy.
– Jańa qoǵamdyq etıkany qalyptastyrýda quqyqtyq tetikterdiń de róli zor. Sondyqtan, Іshki ister mınıstrligi osy kúnderi haıp úshin jaǵa ustatarlyq áreketterge baratyn áleýmettik jeli qoldanýshylaryn, qaýipti prank jasaýshylardy jaýapkershilikke tartyp, olardyń atyn atap, túsin tústep ashyq kórsete bastady. Quqyq buzýshylarǵa qatysty mundaı sharalardy qoldaný ózgelerge sabaq bolatyny anyq, – dedi Erlan Qarın.
Aıta keteıik, buǵan deıin Qazaqstannyń kıeli nysandary ıÝNESKO tizimine engenin málimdedi.
