Erlan Qarın ıÝNISEF uıymynyń Qazaqstandaǵy ókili Rashed Mustafa Sarvarmen kezdesti
ASTANA. KAZINFORM – Astanada Qazaqstan Respýblıkasynyń Memlekettik keńesshisi Erlan Qarın Birikken Ulttar Uıymy Balalar qorynyń (ıÝNISEF) elimizdegi ókildiginiń basshysy Rashed Mustafa Sarvarmen kezdesti, dep habarlaıdy Aqordanyń baspasóz qyzmeti.
Erlan Qarın óskeleń urpaqty qoldaýǵa jáne olardy jan-jaqty damytýǵa baǵyttalǵan júıeli memlekettik sharalar týraly málimet berdi. Sonymen birge, balalardyń quqyǵyn qorǵaý Prezıdent Qasym-Jomart Toqaev júrgizip otyrǵan saıasattyń basym baǵytynyń biri ekenin atap ótti.
Memlekettik keńesshi bir jyl buryn Áıelder men balalardyń quqyǵyn qorǵaý týraly zań kúshine engenine nazar aýdardy.
Sarapshylardyń paıymdaýynsha, qabyldanǵan zańnyń jáne memleket júzege asyryp jatqan naqty sharalardyń nátıjesinde Qazaqstanda áıelder men balalardyń quqyǵyn qorǵaýdyń ozyq zańnamasy men pármendi júıesi qalyptasty.
Mysaly, bıylǵy 5 aıdyń qorytyndysy boıynsha kámelet jasqa tolmaǵandarǵa qarsy jasalǵan jynystyq sıpattaǵy qylmys sany 21,3 paıyzǵa, al pedofılııamen baılanysty qylmys 40,7 paıyzǵa azaıǵan.
Mektepterge «111» memlekettik baılanys ortalyǵynyń QR-kody ornatylǵannan keıin balalar arasyndaǵy zorlyq-zombylyq, býllıng, kúrdeli psıhıkalyq-emotsııalyq jaǵdaılardy anyqtaý kórsetkishi artty. Bıyl bes aıdyń ishinde 86 myńnan astam bala atalǵan qyzmet túrine júgingen. Sonyń ishinde 2 myńnan astam bala zorlyq-zombylyqtan, býllıngten, synyptastarymen, ata-anasymen kúrdeli qarym-qatynastan kúızeliske túskenin aıtyp kómek suraǵan. Balalar ózine ózi qol jumsamaq bolǵan 28 oqıǵa anyqtalyp, qaterdiń der kezinde aldyn alǵan.
Erlan Qarın ıÝNISEF keńsesimen óte tyǵyz ári nátıjeli yqpaldastyqtyń qalyptasqanyn aıtty. Memlekettik keńesshi balalardyń quqyqtaryn qorǵaýǵa qatysty Qazaqstannyń birqatar júıeli bastamalaryn qoldaýda ıÝNISEF keńsesiniń mańyzdy róline erekshe toqtaldy.
Óz kezeginde Rashed Mustafa Sarvar ıÝNISEF-tiń Qazaqstandaǵy keńesi atqaryp jatqan jumys týraly aıtyp, keleshek jumys josparyn, oı-pikirlerin bólisti.
Kezdesý qorytyndysy boıynsha taraptar ózara qarym-qatynastyń aldaǵy baǵyttaryn aıqyndap, urpaq múddesi úshin áriptestikti kúsheıte túsýge jáne birlesken bastamalardy júzege asyrýǵa daıyn ekenin jetkizdi.
Osyǵan deıin Erlan Qarın elde áıelder men balalardyń quqyǵyn qorǵaýdyń tıimdi júıesi qalyptasqany týraly aıtqanyn jazdyq.