Erlan Qarın Ulttyq keńestiń quramy qalaı jasaqtalǵanyn aıtty

NUR-SULTAN. QazAqparat – Ortalyq kommýnıkatsııalar qyzmetinde Ulttyq qoǵamdyq keńestiń músheleri uıymnyń aldyna qoıylyp otyrǵan mindetter týraly málim etti, dep habarlaıdy QazAqparat tilshisi.

QR Prezıdentiniń Keńesshisi, Ulttyq qoǵamdyq keńestiń hatshysy Erlan Qarın Ulttyq keńestiń QR Prezıdenti janyndaǵy konsýltatıvti keńesshi organ bolatynyn aıtty.

«Keńestiń negizgi maqsaty - jurtshylyqtyń, saıası partııalardyń azamattyq qoǵam ókilderiniń qatysýymen memlekettik saıasatqa qatysty ózekti, mańyzdy máselelerge qatysty usynymdardy tujyrymdaý. Negizgi mindetteri - memlekettik baǵdarlamalar men normatıvtik-quqyqtyq aktilerdiń jobalaryna qoǵamdyq saraptama júrgizý jáne jurtshylyqtyń, azamattyq qoǵamnyń pikirin eskere otyryp, mańyzdy problemalardy talqylaý. Jurtshylyqtyń, saıası partııalardyń, úkimettik emes sektor men memlekettik organdar ókilderi arasynda syndarly dıalogty qamtamasyz etý. Ulttyq keńestiń tóraǵasy Prezıdenttiń ózi bolyp tabylady», - dedi Erlan Qarın.

Keńes hatshysy uıymnyń quramyna saıası partııalar, qoǵamdyq uıymdar ókilderi kirgenin aıtady.

«Keńestiń quramyn anyqtaý úshin sońǵy bir aıda konsýltatsııalar ótkizilgen bolatyn. Sol konsýltatsııalarda aıtylǵan pikirlerdi júıelep, osyndaı sheshimge keldik. Qoǵam belsendileri mynandaı tártipke sáıkes irikteldi. Uzaq ýaqyt boıy qoǵamdyq mańyzy bar máselelerdi turaqty kóterip júrgen belsendiler, naqty bir sala boıynsha shuǵyldanyp júrgen kásibı mamandar keńeske kirdi. Olar qoǵamnyń barlyq salasynan irikteldi. Saıası-qoǵamdyq alańdardyń, túrli saıası kúshterdiń ókilderin tartýǵa tyrystyq. Eski oppozıtsııa ókilderi de, jańa qalyptasyp kele jatqan qarsy toptardyń ókilderi de bar», - dedi ol.

Eske salsaq, QR Prezıdenti Qasym-Jomart Toqaev elordadaǵy ulyqtaý rásiminde Ulttyq qoǵamdyq senim keńesin qurý kerektigi týraly alǵash aıtqan bolatyn.

Keıin Memleket basshysy QR Prezıdenti janynan Ulttyq qoǵamdyq senim keńesin qurý týraly Jarlyqqa qol qoıdy

Belgili saıasattanýshy Aıdos Sarym atalmysh Keńeske qoǵamǵa sózi ótetin azamattar kóptep enip, olar bir-birine qurmetpen qaraı otyryp, tıisti sheshimderdi shyǵarýǵa qaýqarly bolýy kerek degen pikirde.

Memleket basshysy Qasym-Jomart Toqaev Aqordada BAQ ókilderine QR Prezıdentiniń syılyqtary men granttaryn tabystaý rásiminde Ulttyq qoǵamdyq senim keńesine BAQ ókilderi kirýi tıistigin aıtqan bolatyn.