Erlan Qarın: Ulttyq keńeste usynylǵan áleýmettik bastama Májiliste qoldaý tapty
«Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine ınklıýzıvti bilim berý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy. Atalǵan zań jobasy erekshe qajettilikteri bar balalar úshin sapaly bilim alýǵa birkelki qol jetkizý jaǵdaılaryn qamtamasyz etýge baǵyttalǵan», dep jazdy Memleket basshysynyń kómekshisi.
Erlan Qarın atalmysh zańnamalyq basta Ulttyq qoǵamdyq senim keńesinde talqylanǵanyn eske saldy.
«Buǵan deıin, 2021 jylǵy 25 aqpanda Ulttyq qoǵamdyq senim keńesiniń V otyrysynda Prezıdent Qasym-Jomart Toqaev elimizde erekshe bilim berý qajettilikteri bar balalardyń sany ósip kele jatqanyn, biraq osi iske mamandandyrylǵan uıymdardyń jumysyn retteıtin qoldanystaǵy normalar eskirgenin atap ótken bolatyn. Osyǵan baılanysty Memleket basshysy óńirlerdiń ereksheligin jáne zamanaýı standarttardy eskere otyryp, osy saladaǵy normatıvterdi jańartýdy tapsyrdy», - deıdi Erlan Qarın.
Sondaı-aq, ol búgin Májiliste qaralǵan zań jobasynda oqý baǵdarlamalary erekshe qajettilikteri bar balalarǵa arnap beıimdeletinin, atalmy sanat úshin jeke damytý baǵdarlamalary ázirlenetinin, psıhologııalyq-pedagogıkalyq súıemeldeý engiziletinin jetkizgen.
«Múmkindigi shekteýli balalardy psıhologııalyq-pedagogıkalyq qoldaýǵa memlekettik bilim berý tapsyrysyn qarjylandyrýdyń jan basyna shaqqandaǵy normatıvi ázirlenetin bolady. Osylaısha, Prezıdenttiń Ulttyq keńes qyzmeti sheńberindegi áleýmettik bastamalarynyń taǵy bir mańyzdy blogy Májiliste jumys isteýde. Bul sharalardy zańnamalyq resimdeý erekshe qajettilikteri bar balalar úshin sapaly ınklıýzıvti bilim alý múmkindigin keńeıtýge múmkindik beredi», - dep jazdy Prezıdent kómekshisi.
