Erlan Qarın: Ulttyq keńes – syndarly pikirtalastar ótetin zııatkerlik alań
«Buǵan deıin málimdegendeı, Ulttyq keńestiń qyzmetine qoǵam belsendilerin tartý maqsatynda UQSK quramy merzimdi túrde rotatsııa júrgizip otyrady. Ulttyq keńeske jalpy kún tártibin jańartyp, jańa taqyryptar men usynystar aıtatyn jańa belsendiler men sarapshylar kelýi kerek. Ulttyq keńestiń ereksheligi de osynda – bul syndarly pikirtalastar ótetin jandy jáne belsendi zııatkerlik alań», – dep jazdy Erlan Qarın Telegram-daǵy óz akkaýntynda.
«Osyǵan baılanysty Ulttyq keńestiń quramyna jańa qoǵam qaıratkerleri men sarapshylar engizildi. Atap aıtqanda, Ulttyq keńeske «Dos» táýelsiz ómir ortalyǵy» múgedekter qoǵamdyq birlestiginiń tóraıymy Dına Erdildınova, «Atameken Business» telearnasynyń bas dırektory Qanat Saharıanov, áleýmettik kásipker Emın Askerov, tanymal jýrnalıst, bloger Órken Kenjebek jáne medıa sarapshy Maksım Rojın kirdi.
Óz kezeginde, rotatsııa aıasynda Ulttyq keńes quramynan Baǵdat Mýsın, Danııar Áshimbaev, Muhtar Taıjan, Seıdahmet Quttyqadam jáne Jánibek Qojyq shyǵaryldy. Áriptesterime birlesken belsendi jumys úshin alǵys aıtqym keledi. Bir jyldan az ýaqyt ishinde Ulttyq keńes aıasynda eldiń ekonomıkalyq, saıası jáne áleýmettik damýy salasyndaǵy mańyzdy reformalar júzege asyryldy. Mańyzdy zańdar men normatıvtik quqyqtyq aktilerdiń aýqymdy paketi qabyldandy. Mamyr aıynda Ulttyq keńestiń úshinshi otyrysy ótip, onyń qorytyndysy boıynsha Prezıdenttiń jańa bastamalaryn iske asyrý jónindegi jospar qabyldandy. Sondaı-aq, UQSK birqatar múshesiniń usynysy boıynsha Keńes qurylymynda mádenı-rýhanı damý máselelerin qarastyratyn taǵy bir top qurylady», – dep atap ótti Erlan Qarın.
