Erlan Qarın: Ulttyq keńes músheleriniń usynystary júzege asyrylyp jatyr
NUR-SULTAN. QazAqparat – Prezıdenttiń keńesshisi Erlan Qarın Parlament Májilisiniń qabyrǵasynda búgin parlamenttik oppozıtsııaǵa qatysty zań jobasynan bólek taǵy da mańyzdy zańdar qaralǵanyn málim etti, dep habarlaıdy QazAqparat tilshisi.
«Búgin Májilis depýtattarynyń parlamenttik oppozıtsııa ınstıtýtyn engizý týraly zań jobasyn buqaralyq aqparat quraldarynyń ókilderi keń aýqymda talqylap jatyr. Alaıda búgin Májilis depýtattary prezıdenttik saıası reformalardyń birqatar mańyzdy zań jobalaryn maquldaǵanyn atap ótý kerek. 2019 jyldyń qyrkúıek aıynda Ulttyq qoǵamdyq senim keńesiniń alǵashqy otyrysynda belgili zańger, quqyq qorǵaýshy Aıman Omarova Qylmystyq Kodekstiń 130-babyn (jala jabý) dekrımınalızatsııalap, 174-bapqa (áleýmettik, ulttyq, rýlyq, násildik, múliktik nemese dinı alaýyzdyqty týdyrý) ózgeris engizýdi usynǵan edi. Onyń bastamasyn Ulttyq keńeske múshe Erlan Saırov, Murat Ábenov, Muhtar Taıjan, Mıhaıl Dorofeev, Marat Shıbutov, Andreı Chebotarev, Talǵat Qalıev, Aıdos Sarym jáne basqa da birqatar azamat qoldaǵan bolatyn. Bul máseleler Ulttyq keńes músheleriniń usynystaryn qaraý josparyna engizildi. Áıtse de birqatar memlekettik organ bul normany kúshinde qaldyrýǵa nemese ishinara dekrımınlızatsııalaýdy usynǵan edi», - dep jazady Memleket basshysynyń keńesshisi Facebook -tegi paraqshasynda.
Erlan Qarınniń jazýynsha, osy talqylaýlardyń nátıjesinde 2019 jyldyń jeltoqsanynda Ulttyq keńestiń ekinshi otyrysynda Prezıdent Qasym-Jomart Toqaev Qylmystyq Kodekstiń 130-babyn tolyǵymen dekrımınalızatsııalaý týraly sheshim qabyldaǵan. Prezıdent sonymen birge 174-bapty izgilendirýdi, qoldanystaǵy redaktsııany túzetýdi usynǵan. Qańtarda tıisti zań jobasy ázirlenip, ol basqa zań jobalary sııaqty ártúrli qoǵamdyq oryndarda jáne Parlament qabyrǵasynda talqylaýlar men pikirtalastardan ótken.
«Mine, búgin birneshe aıǵa sozylǵan qyzý talqydan keıin Májilis «Qazaqstan Respýblıkasynyń keıbir zańnamalyq aktilerine atqarýshylyq is júrgizý máseleleri boıynsha ózgerister men tolyqtyrýlar engizý týraly» zań jobasyn maquldady. Depýtattardyń bastamasymen «jala jabý» baby tolyǵymen Qazaqstan Respýblıkasynyń Ákimshilik quqyqbuzýshylyq týraly kodeksine engizildi. Dál osy zań jobasynda Qazaqstan Respýblıkasy Qylmystyq Kodeksiniń 174-babyna ózgerister men tolyqtyrýlar engizildi. Keıbireýler bul baptaǵy ózgerister tek redaktsııalyq ózgertýlermen ǵana shekteldi dep sanaıdy. Áıtse de olaı emes. Іs júzinde Prezıdent bul bapty izgilendirýdi tekke usynǵan joq. Memleket basshysy birinshi kezekte bas bostandyǵynan aıyrýdan basqa jaýapkershilik sharalaryn qarastyrýdy usyndy», - deıdi ol.
Prezıdenttiń keńesshisi jańa túzetýlerge sáıkes, bul bap 2000-nan 7000 AEK-ke deıingi mólsherde aıyppul salýdy qarastyratynyn (qazir 2 jyldan 7 jylǵa deıin bas bostandyǵyn shekteý ǵana) jetkizdi.
«Osylaısha bastamalardyń saıası blogynan basqa (partııalar, saılaý týraly jáne parlamenttik oppozıtsııa ınstıtýtyn engizý týraly) bizdiń quqyq qorǵaýshylar men jýrnalısterdiń basqa da usynystary júzege asyrylýda. Bul zań jobalary endi Parlament Senatynda talqylanady», - dep túıdi Erlan Qarın.
