Erlan Qarın súıikti kitaptarynyń tizimin jarııalady
ASTANA. KAZINFORM – Ádebı chellendjdi memlekettik keńesshi Erlan Qarın qabyldap, eGov arqyly belgilegen súıikti kitaptaryn usyndy.
— Qurmetti dostar, «Ulttyq kitap kúni» bıyl alǵash ret atalyp ótkenin bilesizder. Munyń túpki ıdeıasy byltyrǵy Atyraýda ótken Ulttyq quryltaıdan bastalady. Memleket basshysy @tokayev_online ozyq oıly ult bolý týraly aıta kelip, onyń bir kilti osy kitap oqý daǵdysynda jatqanyna toqtalǵan bolatyn. Sóıtip, Qasym-Jomart Kemelulynyń tapsyrmasy boıynsha 23 sáýir «Ulttyq kitap kúni» bolyp bekitilgen edi, — dedi ol.
Erlan Qarın qandaı kitap oqý degen másele de óte mańyzdy dúnıe ekenin aıtty.
— Kitap oqý óz aldyna, qandaı kitap oqý degen másele de óte mańyzdy dúnıe. Bul rette, kim neni oqyp jatyr, men ne oqımyn degen suraq alǵa shyǵady. Oqyrmandar arasynda kitap almasý mádenıeti de bar ekenin bilesizder. Jazýshylarymyzdyń da qolǵa túse bermeıtin kitapty bir-birinen attaı qalap, surap, tipti «suramaı» alyp jatatyny týraly da estelikter de az emes. Munyń bári, túptep kelgende, adamzattyń kitapqa qumarlyǵyn ǵana emes, kitapqa degen talǵamyn da kórsetedi, — dedi Memlekettik keńesshi.
Ol jaqynda jelide belgili aqyn Qalqaman Sarınniń bastamasymen bastaý alǵan ádebı estafetany dintanýshy, qoǵam belsendisi Qaırat Joldybaıdan alyp, jalǵastyryp, búgin eGov arqyly belgilegen súıikti kitaptaryn usyndy:
1. Abaı. Qara sózder jınaǵy;
2. Maǵjan Jumabaev. Óleńder jınaǵy;
3. Muhtar Áýezov. «Abaı joly»;
4. Jyraýlar poezııasy. «Bes ǵasyr jyrlaıdy»;
5. Іlııas Esenberlın «Kóshpendiler»;
6. Baýyrjan Momyshuly «Soǵys psıhologııasy»;
7. Ábish Kekilbaev «Úrker»;
8. Dýlat Isabekov «Qarǵyn»;
9. Maksım Zverev «Kladovaıa chýdes»;
10. Tólen Ábdik «Parasat maıdany».
— Ádebı estafetany jalǵastyrý úshin, Qazaqstan Respýblıkasy Parlamenti Májilisiniń tóraǵasy — Qoshanov Erlan Jaqanulyna @koshanov_online, Jazýshylar odaǵynyń tóraǵasy Mereke Qulkenovke, Ulttyq mýzeı dırektory — Berik Ábdiǵalıulyna @abdygaliuly, belgili jýrnalıst, bloger — Órken Kenjebekke @orkeni joldaımyn. Qurmetti kitapsúıer qaýym, sizder de jalpyhalyqtyq saýalnama qatysyp, eGov portaly arqyly súıip oqıtyn 10 kitabyńyzdy usyna alasyz. Saýalnama nátıjesi qazaq rýhanııatyndaǵy taǵy bir ataýly mereke — «Abaı kúni» (10 tamyz) jarııalanady, — dedi Erlan Qarın.
Aıta ketelik redaktsııa alqasy Qazaqstan tarıhy jónindegi akademııalyq basylymnyń birinshi tomyn qaraǵan edi.