Erlan Qarın sybaılas jemqorlyqqa qarsy is-qımyl jónindegi komıssııasynyń otyrysyn ótkizdi

ASTANA. QazAqparat - QR Memlekettik keńesshisi Erlan Qarınniń tóraǵalyǵymen Qazaqstan Respýblıkasy Prezıdenti janyndaǵy sybaılas jemqorlyqqa qarsy is-qımyl máseleleri jónindegi komıssııasynyń otyrysy ótti, dep habarlaıdy QazAqparat Aqordaǵa silteme jasap.

Otyrysta 2021-2023 jyldarǵa arnalǵan kóleńkeli ekonomıkaǵa qarsy is-qımyl jónindegi keshendi jospardyń oryndalý barysy qaraldy.

Jıynda Qarjylyq monıtorıng agenttigi, Qarjy mınıstrligi, Indýstrııa jáne ınfraqurylymdyq damý mınıstrligi basshylarynyń keshendi jospardy júzege asyrýǵa qatysty esebi tyńdaldy.

Erlan Qarın halyqtyń muqtajdyǵyn ótýge baǵyttalǵan naqty naryqtyq ekonomıkaǵa kóshý barysynda kóleńkeli ekonomıkanyń kólemin azaıtý erekshe mańyzdy ekenin aıtty.

Memleket basshysy mundaı mindetti keshe ótken elimizdiń áleýmettik-ekonomıkalyq damý máseleleri jónindegi keńeıtilgen keńeste qoıǵan bolatyn.

Memlekettik keńesshi josparlanǵan is-sharalardy óz deńgeıinde atqarýdyń, kózdegen nátıjege qol jetkizýdiń, júrgizilip jatqan jumystar kóleńkeli ekonomıkanyń deńgeıin tómendetýge shynaıy áser etýiniń, sondaı-aq, kóleńkeli áreketterge urynǵan basqa da salalardy anyqtaýdyń mańyzdy ekenin atap ótti.

Aıtalyq, Indýstrııa jáne ınfraqurylymdyq damý mınıstrligi boıynsha keshendi josparǵa kólik jáne qurylys salalaryn qamtyǵan is-sharalar ǵana kirgen.

Mysaly, jer qoınaýyn paıdalaný salasynda da kóleńkeli ekonomıkamen baılanysty táýekelder bar.

Mınıstrlikke jetekshilik etetin barlyq sala boıynsha kóleńkeli ekonomıkanyń syn-qaterlerin joıý jóninde tapsyrma berildi.

Sonymen qatar, memlekettik organdar tarapynan qabyldanatyn sharalar bızneske qysym kórsetip, ınvestıtsııalyq klımattyń nasharlaýyna ákep soqpaýy kerek.

Jıynda aıtylǵan oı-pikirlerdi saralaı kele komıssııa tarapynan naqty usynystar ázirlendi.

Al otyrys qorytyndysy boıynsha Memlekettik keńesshi Erlan Qarın birqatar tapsyrma berdi, onyń oryndalýy baqylaýǵa alyndy.