Erlan Qarın: sońǵy 6 jylda Qazaqstan azamattyǵynan bas tartýǵa berilgen ótinish sany 22 ese azaıdy

ASTANA. KAZINFORM – Memlekettik keńesshi Azamattyq máseleleri jónindegi komıssııanyń kezekti otyrysyn ótkizdi. Bul týraly Aqordanyń baspasóz qyzmeti habarlady. 

 

Memlekettik keńesshi Erlan Qarınniń tóraǵalyq etýimen Qazaqstan Respýblıkasy Prezıdentiniń janyndaǵy Azamattyq máseleleri jónindegi komıssııanyń kezekti otyrysy ótti.

Jıynda Qazaqstan azamattyǵyna qabyldaý jáne odan shyǵarý máseleleri qaraldy.

Basqosýda Memlekettik keńesshi sońǵy alty jylda elimizdiń azamattyǵynan bas tartqan adamdardyń sany turaqty túrde azaıyp kele jatqanyn atap ótti.

Mysaly, 2019 jyly 1,7 myń adam azamattyqtan bas tartsa, 2020 jyly – 944, 2021 jyly – 123, 2022 jyly – 114, 2023 jyly – 107, al 2024 jyly 77 adam azamattyqtan shyqqan.

Munyń bári Qazaqstan azamattyǵy ınstıtýtynyń abyroı-bedeli artyp kele jatqanyn jáne turǵyndardyń el bolashaǵyna degen seniminiń nyǵaıa túskenin kórsetedi.

Aıta ketelik Qazaqstan azamattyǵyn alýǵa nıetti adamdar úshin ótken jyldyń sońynda arnaıy test ázirlengeni týraly jazǵan edik.