Erlan Qarın: Іshki saıasat salasyndaǵy qujat — memlekettik saıasattyń ıdeıalyq mánin túsinýge múmkindik beredi

ASTANA. KAZINFORM — Prezıdent Qasym-Jomart Toqaev «Qazaqstan Respýblıkasy ishki saıasatynyń negizgi qaǵıdattary, qundylyqtary men baǵyttaryn bekitý týraly» Jarlyqqa qol qoıǵany belgili.  Memlekettik keńesshi Erlan Qarın atalǵan Jarlyqqa qatysty óz oıyn aıtty. 

— Ulttyq quryltaıdyń Býrabaıda ótken ІV otyrysynda Memleket basshysy birqatar sarapshylar men qoǵam ókilderiniń ishki saıasat salasynda tujyrymdamalyq qujat qabyldaý qajettigi jónindegi bastamasyn qoldady. Prezıdent Ákimshiligi jarty jyldan astam ýaqyt boıy túrli dıalog alańdarynda Ulttyq quryltaı músheleriniń, sarapshylardyń, qoǵamdyq jáne ǵylymı uıymdar ókilderiniń qatysýymen pikirtalastar uıymdastyrdy, — dep jazdy ol. 

Memlekettik keńesshi sarapshylyq talqylaýlardyń nátıjesinde ishki saıasat salasynda júrgizilip jatqan jumysty júıeleıtin tujyrymdamalyq qujattyń jobasy ázirlengenin aıtty. 

— Búgin Memleket basshysy «Qazaqstan Respýblıkasy ishki saıasatynyń negizgi qaǵıdattary, qundylyqtary men baǵyttaryn bekitý týraly» Jarlyqqa qol qoıdy. Іshki saıasat salasyndaǵy jumysty júıelep, úılestirýdi kózdeıtin qujat birinshi kezekte memlekettik organdarǵa arnalǵan. Sonymen qatar bul qoǵamǵa júrgizilip otyrǵan memlekettik saıasattyń ıdeıalyq mánin jáne elimizdiń bolashaqtaǵy beınesiniń aıqyn baǵytyn túsinýge múmkindik beredi, — dedi Erlan Qarın. 

Aıta keteıik, Prezıdent Ákimshiligi men múddeli memlekettik organdar Memleket basshysynyń jyl saıynǵy Joldaýlaryn, sóılegen sózderin, Qazaqstan Respýblıkasynyń 2029 jylǵa deıingi ulttyq damý josparyn negizge ala otyryp, «Іshki saıasattyń negizgi qaǵıdattary, qundylyqtary men baǵyttary» qujatyn daıyndady. Tolyǵyraq myna siltemeden oqyńyz.