Erlan Qarın sheteldik BAQ ókilderimen kezdesti

ASTANA. QazAqparat - QR Memlekettik keńesshisi Erlan Qarın Ortalyq kommýnıkatsııalar qyzmeti alańynda aldaǵy Májilis jáne barlyq deńgeıdegi máslıhattar depýtattarynyń saılaýyn nasıhattaý úshin Qazaqstanǵa kelgen sheteldik jýrnalıstermen kezdesti, dep habarlaıdy Aqorda.

Kezdesýge Eýropa, Azııa, Soltústik Afrıka jáne TMD sekildi 37 memleketten kelgen 43 sheteldik BAQ ókili qatysty.

Erlan Qarın bul saılaýdyń negizi bir jyl buryn, ıaǵnı Prezıdent óz Jolaýynda keshendi reformalar baǵdarlamasyn usynǵan kezde qalanǵanyn aıtty.

Memlekettik keńesshi júzege asyrylyp jatqan saıası reformalar saılaý júıesine áser etkenin, sonyń nátıjesinde partııalar arasyndaǵy básekelestik pen azamattyq belsendiliktiń artýyna jaǵdaı jasalǵanyn atap ótti.

«Aldaǵy saılaý prezıdenttik reformalar baǵdarlamasy aıasynda iske asqan memlekettik ınstıtýttardy júıeli transformatsııalaý jumysynyń qorytyndylap, memlekettik-saıası júıeniń múldem jańa modelge kóshkenin kórsetedi», – dedi Erlan Qarın.

Brıfıng barysynda Memlekettik keńesshi sheteldik jýrnalısterdiń Qazaqstannyń ishki saıası protsesterine qatysty birqatar suraǵyna jaýap berdi.