Erlan Qarın saıasılandyrýǵa bolmaıtyn taqyryptardy atady

ASTANA. KAZINFORM – Memlekettik keńesshi Erlan Qarın saıasılandyrýǵa bolmaıtyn, emotsııasyz, salmaqty pikiralmasý qajet taqyryptardy atady.

Qazaqstan telearnasynyń «Bas taqyryp» baǵdarlamasynda Memlekettik keńesshige «Qoǵamdyq pikirtalas kezinde attap ketýge bolmaıtyn shek, ıaǵnı redlaın bolý kerek dedińiz. Bul ustanym qanshalyqty durys? Bul ustanymnyń sońy tsenzýraǵa alyp barmaı ma?» — degen saýal qoıylǵan edi. Osy oraıda Erlan Qarın bılik óziniń ustanymdaryn qoǵamǵa ashyq, bultartpaı jarııalaýy kerektigin basa aıtty.

«Onyń ústine, bul rette jasyryp aıtatyndaı nemese basqasha qabyldanýy múmkin dep ýaıymdaıtyndaı negiz joq dep oılaımyn. Sebebi, bılik óz ustanymdaryn aldymen ashyq jetkizýi tıis jáne bul ustanymdar bárine qajet. Ol qandaı másele? Meniń aıtpaǵym, elimizde sońǵy jyldary júzege asqan saıası reformanyń nátıjesinde plıýralızm, ıaǵnı kózqaras alýantúrliligi, pikir alýantúrliligi ábden ornyqty. Áleýmettik jeliden, basqa jerlerden qaraıtyn bolsaq, bılikti synaýdy aıtpaǵannyń ózinde kez kelgen máseleni kóterip, aıtyp jatady. Qalaǵan formasynda jetkizedi. Qalaǵan taqyrypty kóterip, qozǵaıdy. Biraq, osy jaǵdaıda keıbir taqyryptar, onyń ishinde din, til, ultaralyq qatynastar, syrtqy saıasat máseleleri boıynsha qatty emotsııaǵa berilmeı, baıypty, salmaqty pikirtalas jasaý qajet. Bul taqyryptardy talqylaýǵa tyıym salynady degendi bildirmeıdi. Biraq, bul taqyryptardy saıasılandyrmaı, emotsııasyz, salmaqty pikiralmasý qajet. Sebebi, kóp memleketterdiń túbine jetken osy taqyryptar tóńiregindegi daýlar. Bizdiń de qoǵam ártúrli, birkelki emes. Erkindik, bostandyq jáne tártip uǵymdarynyń qundylyqtary bir-birine qaıshy emes», — dedi Erlan Qarın.