Erlan Qarın respýblıkalyq etnomádenı birlestik basshylarymen kezdesti
ASTANA. KAZINFORM – Memlekettik keńesshi Erlan Qarın Astanadaǵy Dostyq úıinde respýblıkalyq etnomádenı birlestikterdiń jetekshilerimen kezdesti. Bul týraly Aqordanyń baspasóz qyzmeti habarlady.
Basqosýǵa Zaınýddın Mahýseev, Akbarjon Ismaılov, Taýfık Karımov, Narıne Mıkaelıan, Ahmet Mýradov, ıÝrıı Tımoşenko, Abdýlla Ismatýllaev, Shavkat Ismaılov, Dmıtrıı Ostankovıch, Abılfas Hamedov, Vıtalıı Tvarıonas, Isıdor Borchashvılı, sondaı-aq Parlament Senaty men Májilisiniń depýtattary Zakırjan Kýzıev, Evgenıı Bolgert, Sergeı Ponomarev, Natalıa Dementeva jáne Qazaqstan halqy Assambleıasy Tóraǵasynyń orynbasary Marat Ázilhanov qatysty.
Kezdesýde Ulttyq quryltaıdyń besinshi otyrysynda aıtylǵan bastamalar men etnomádenı birlestikterdiń eldegi saıası jańǵyrýdyń negizgi baǵyttaryn iske asyrýǵa qatysý máseleleri talqylandy.
Memlekettik keńesshi júrgizilip jatqan konstıtýtsııalyq reformanyń elimizdiń ornyqty damýynda mańyzy zor ekenin atap ótti. Erlan Qarınniń aıtýynsha, memlekettik saıasattyń «Birligimiz – áralýandyqta» myzǵymas qaǵıdaty qoǵamdyq birliktiń negizi bolyp sanalady.
Etnomádenı birlestik ókilderi Memleket basshysynyń mádenı-gýmanıtarlyq, áleýmettik-ekonomıkalyq jáne saıası baǵyttaǵy bastamalary men sheshimderi, sondaı-aq Quryltaıdyń besinshi otyrysynda aıtylǵan usynystar el damýynyń jańa kezeńine qatysty tutas kózqarasty qalyptastyratynyn jetkizdi.
Etnomádenı birlestikterdiń jetekshileri Prezıdent bastamalaryn qoldaıtynyn bildirip, aldaǵy reformalardy iske asyrýǵa belsendi túrde qatysýǵa daıyn ekenin aıtty.
Aıta keteıik, Qazaqstandaǵy orys, slavıan jáne kazak uıymdary qaýymdastyǵynyń tóraǵasy, Májilis depýtaty Sergeı Ponomarev V Ulttyq quryltaıda sóz alyp, etnomádenı birlestikterdiń saıası protsesterge aralasý múmkindigi týraly oı qozǵady.