Erlan Qarın: Prezıdenttik kadr rezervinen 164 adam memlekettik basqarý júıesinde jumys isteıdi
«Qazirgi ýaqytta Prezıdenttik jastar kadr rezervinen 164 adam memlekettik basqarý júıesiniń ártúrli deńgeıinde jumys istep jatyr. Ortalyq memlekettik organdarda - 90, jergilikti organdarda - 41, ulttyq kompanııalarda jáne basqa uıymdarda - 33 rezervıst bar, 12 rezervıst - joǵary basshylyq laýazymdarda ózin dáleldeýge múmkindik aldy», - dep jazdy QR Prezıdentiniń keńesshisi Erlan Qarın Telegram kanalynda.
Onyń aıtýynsha, barlyq rezervshiler úshin olardyń kásibı sheberligi men quzyrettiligin qosymsha arttyratyn jeke damý jospary jasaldy.
«Memlekettik basqarý akademııasynda olardy oqytyp, Prezıdent ákimshiliginiń, ortalyq memlekettik organdardyń basshylyǵymen kezdesýler uıymdastyrylady. Jastardyń kadr rezervin qurýdy Memleket basshysy ótken jyly saılaýaldy tuǵyrnamasynda kótergen bolatyn. Joba óziniń tıimdiligin kórsetip otyr», - deıdi ol.
Onyń aıtýynsha, Ulttyq qoǵamdyq senim keńesi aıasynda Prezıdenttiń taǵy bir mańyzdy bastamasy – partııalyq saılaý tizimine jastarǵa 30% kvota engizý bolǵan. Osy normany engizýdiń nátıjesi aldaǵy parlament pen máslıhattarǵa saılaý qorytyndysynda kórinýi tıis.
Aıta keteıik, Memleket basshysy Qasym-Jomart Toqaev ulyqtaý rásiminde Prezıdenttik kadr rezervi qurylatynyn málimdedi. Q.Toqaevtyń Jarlyǵymen QR Prezıdentiniń janyndaǵy Jastar kadr rezervi jónindegi ulttyq komıssııa quryldy. 2019 jyly qyrkúıekte Prezıdenttik jastar kadr rezervine ótinim qabyldaı bastady.
