Erlan Qarın Prezıdentke Ultyq keńestiń jumysy jaıly esep berdi

NUR-SULTAN. QazAqparat – Jýyq arada Ulttyq keńes músheleriniń birneshe mınıstrmen kezdesýi uıymdastyrylady. Bul týraly Ulttyq qoǵamdyq senim keńesiniń 6-otyrysynda Ulttyq qoǵamdyq senim keńesiniń hatshysy Erlan Karın aıtty, dep habarlaıdy QazAqparat tilshisi.

«Ulttyq qoǵamdyq senim keńesiniń bes otyrysynan beri keńes músheleri hatshylyqpen birge birneshe baǵytta jumys atqardy. Birinshiden, Ulttyq keńes músheleri tyǵyz qarym-qatynasty damyta otyryp, jańa usynystardy birlese pysyqtady. Atap aıtqanda, bıyl onlaın formatta Ulttyq keńes músheleriniń jáne mınıstrlerdiń qatysýymen 7 kezdesý ótti. Onda kóptegen usynys talqylanyp, sonyń nátıjesinde birqatar másele oń sheshimin tapty. Jýyq arada taǵy birneshe mınıstrmen onlaın kezdesý ótkizýdi josparlap otyrmyz. Ekinshiden, mamyr aıynan bastap Ulttyq keńes músheleri óńirlerge saparǵa shyǵa bastady. Olar Mańǵystaý, Soltústik Qazaqstan, Qaraǵandy oblystarynda boldy. Sapar barysynda aımaqtaǵy belsendi azamattarmen, jergilikti qoǵam ókilderimen tıimdi baılanys ornatyldy. Sonyń arqasynda óńirlerdegi ózekti máselelerdi respýblıkalyq deńgeıde kóterýge múmkindik týdy. Dál osyndaı kezdesýler basqa da oblystarda ótkizý kózdelýde», - dedi Erlan Qarın.

Keńes hatshysy úshinshiden, Ulttyq keńes músheleri men hatshylyq jańa usynystar toptamalaryn ázirleýmen qatar Prezıdenttiń reformalarynyń iske asyrylý barysyn únemi baqylaýda ustap otyrǵandyǵyn basa aıtty.

«Ulttyq keńestiń árbir otyrysynan keıin Memleket basshysynyń tapsyrmalaryn oryndaý úshin arnaýly jospar bekitiledi. Hatshylyq osy jospardyń negizinde barlyq bastamany ýaqytyly jáne sapaly oryndalýyn qadaǵalaıdy. Sodan keıin tıisti anyqtamalyq aqparat turaqty túrde Prezıdent Ákimshiligi basshylyǵy men keńes múshelerine jiberilip, resmı saıtta jarııalanady. Osylaısha, áriptesterimiz Memleket basshysynyń bastamalaryn júzege asyrý barysynan únemi habardar bolyp, iske asyrylǵan reformalar boıynsha tolyq taldaý jasaı alady», - dedi ol.

Onyń atap ótýinshe, Ulttyq keńes qurylǵannan bergi 2,5 jyldyń ishinde keńeske 19 adam jańadan múshe boldy. Sol arqyly keńestiń quramy ǵana emes, onda qaralatyn máselelerdiń mazmuny da tolyǵa tústi. Munyń barlyǵy Ulttyq keńes qyzmeti tıimdiligin arttyrýǵa múmkindik beredi. Bul jumys aldaǵy ýaqytta da jalǵaspaq.