Erlan Qarın Prezıdent janyndaǵy Jastar saıasaty jónindegi keńestiń kóshpeli otyrysyn ótkizdi
ASTANA. KAZINFORM – Memlekettik keńesshi Erlan Qarın Qostanaı qalasynda oblys ákimi Qumar Aqsaqalovtyń, óńirdegi qalalar men aýdan ákimderiniń, memlekettik organdar jetekshileriniń qatysýymen ishki saıasat máselelerine qatysty aımaqtyq keńes ótkizdi. Bul týraly Aqordanyń baspasóz qyzmeti málim etti.
Jıynda Memleket basshysynyń Joldaýynda belgilengen mindetterdi júzege asyrý joldary, ishki saıasat baǵytyndaǵy jumys barysy, etnosaralyq jáne konfessııaaralyq kelisimdi nyǵaıtý, onomastıka, aqparat salasy jáne jastar saıasaty máseleleri talqylandy.
Memlekettik keńesshi oblystaǵy birqatar mekteptiń dırektorlarymen kezdesip, «Birtutas tárbıe» atty jańa baǵdarlamany júzege asyrý máselesine qatysty pikir almasty.
Sondaı-aq Memlekettik keńesshi QR Prezıdenti janyndaǵy Jastar saıasaty jónindegi keńestiń kóshpeli otyrysyn ótkizdi. Keńes músheleri qazirgi eń ózekti taqyryptyń biri – jastardy jumyspen qamtý jáne jumysshy mamandyqtardyń mártebesin kóterý máselesin talqylady. Bul basqosý aımaqtaǵy eń iri óndiris ortalyǵy sanalatyn «Allur» zaýytynyń alańynda ótti. Oǵan osy kásiporynnyń jas mamandary qatysty.
Erlan Qarın Keńestiń jastar saıasatynyń ózekti máselelerin sheshýge bastamashy bolyp, Prezıdenttiń jastarǵa qatysty reformalaryn júzege asyrýǵa belsendi atsalysyp kele jatqanyn aıtty.
Sonymen qatar Memlekettik keńesshi avtomobıl kóligi kolledjiniń stýdentterimen kezdesti.
– Prezıdenttiń 2025 jyldy «Jumysshy mamandyqtar jyly» dep jarııalaýy memlekettiń kásiptik bilim berý isin odan ári damytýǵa múddeli ekenin bildiredi,– dedi Erlan Qarın.
Budan bólek, Erlan Qarın Joldaýdy tıimdi júzege asyrýdyń jáne Atom elektr stansasyn salý máselesine qatysty aldaǵy referendýmnyń mańyzdylyǵy týraly aıtty.
Memlekettik keńesshi ótkizgen kezdesýlerdiń qorytyndysy boıynsha quzyrly organdarǵa ishki saıasat salasyndaǵy jumysty jetildirý boıynsha naqty usynystar men tapsyrmalar berildi.
