Erlan Qarın: Prezıdent jańa ıdeologııalyq strategııany iske asyrýdyń naqty qadamdaryn usyndy
«Prezıdent Qasym-Jomart Toqaev Ulttyq quryltaıda sóılegen sózinde qoǵamnyń rýhanı damýynyń perspektıvalary men tujyrymdamalyq baǵdaryn ǵana aıqyndap bergen joq. Sonymen qatar, elimizdiń jańa ıdeologııalyq strategııasyn iske asyrýdyń naqty qadamdaryn usyndy», - deıdi Erlan Qarın.
Memlekettik keńesshi bul arada negizgi birneshe baǵytty atap ótedi.
«Birinshiden, Memleket basshysy ulttyń jańa sapasyn qalyptastyrýdy, ulttyq qundylyqtardy odan ári damytýdy, halqymyzdyń biregeıligin nyǵaıtýdy ıdeologııalyq jumystyń basty basymdyqtary retinde aıqyndap berdi.
Ekinshiden, Qasym-Jomart Toqaev Prezıdent qyzmetine kirisken sátten bastap Táýelsizdik murattary jáne patrıotızm, eńbek pen bilim kýlti, quqyq pen tártip, adamgershilik pen jaýapkershilik sekildi qundylyqtardy maqsatty túrde alǵa tartyp keledi. Endi Prezıdent bul qundylyqtardy»Ádiletti Qazaqstan – Berekeli qoǵam – Adal azamat«atty biryńǵaı tujyrymdamaǵa biriktirip otyr.
Qoǵamnyń jańa ádebin qalyptastyrý baǵytyndaǵy jumys óte aýqymdy. Ony júzege asyrýǵa memleket te, tutas qoǵam da, elimizdiń árbir azamaty da jaýapkershilikpen qaraýy qajet.
Úshinshiden, Memleket basshysy bilim, ǵylym, mádenıet salalary boıynsha naqty jobalar usyndy. Al bul – elimizdiń ıdeologııalyq baǵytyn damytýdyń naqty baǵdarlamasy.
Sonymen qatar, ulttyń jańa sapasyn qalyptastyrý jónindegi bastamalardy tez arada iske asyrý múmkin emes. Osylaısha, Prezıdent el damýynyń uzaq merzimdi kún tártibin belgilep berdi.
Tórtinshiden, atalǵan bastamanyń jurtshylyqqa usynylǵan ýaqytyn da erekshe atap ótken jón. Biz qazir saıası reformalardyń basym bóligin júzege asyrýdy aıaqtap, ekonomıkada úlken ózgeristerdi bastaıtyn sátte turmyz. Sondyqtan, Prezıdenttiń qoǵamdyq qundylyqtardy nyǵaıtý týraly bastamasy der kezinde kóterilip otyr.
Jalpy alǵanda, biz Prezıdent reformalarynyń úsh baǵyttaǵy úılesimdiligin kórip otyrmyz: saıasat, ekonomıka, ıdeologııa», - dedi ol.
