Erlan Qarın: Prezıdent usynǵan saıası reformanyń úshinshi paketi de iske asa bastady
«Prezıdent bastamashy bolǵan saıası reformalardyń ekinshi jáne úshinshi paketin is júzinde júzege asyrý bastaldy. Elimizdiń birqatar óńirinde aýyldyq okrýg ákimderin saılaý kúni belgilengen. 25 shildede bir mezgilde 700-den astam aýyl ákimderin saılalanady. Qalǵan ákimderdi saılaý olardyń ókilettik merzimi aıaqtalǵannan keıin ótkiziledi», - dep jazdy Erlan Qarın.
Prezıdent kómekshisi atalǵan túıindi bastamanyń iske asýyn saıası jańǵyrýdyń jańa kezeńin aıǵaqtaıtyn óte mańyzdy oqıǵa retinde baǵalap otyr.
«Aýyl ákimderiniń tikeleı saılaýyn ótkizý jónindegi bastamany alǵash ret Memleket basshysy 2020 jylǵy 1 qyrkúıekte óziniń Joldaýynda aıtqan bolatyn. Al 2021 jyldyń 24 mamyrynda Prezıdent Qasym-Jomart Toqaev zańnamaǵa aýyl ákimderin tikeleı saılaýdy engizýge múmkindik beretin túzetýlerdi kózdeıtin zańnamalyq aktilerge qol qoıdy. 5 maýsymnan bastap saılaý zańnamasynyń jańa normalary kúshine endi. Nátıjesinde bir jyldan az ýaqyt ishinde bul bastama júzege asyryldy», - deıdi Memleket basshysynyń kómekshisi.
Onyń aıtýynsha, Qasym-Jomart Toqaev bastamashy bolǵan saıası reformalardyń aıasynda búginniń ózinde 10 zań qabyldanǵan.
Jyl sońyna deıin bul baǵytta taǵy birqatar zań qabyldaý josparlanyp otyr.
Ulttyq qoǵamdyq senim keńesiniń hatshysy Erlan Qarın búgin Almatyda ótken saıası reformalardy júzege asyrý jónindegi saraptamalyq talqylaýda aýyl ákimin saılaý naýqany el ómirindegi mańyzdy oqıǵa bolatynyn aıtqan bolatyn.
