Erlan Qarın: Polıtsııa, ákimshilik ǵımarattaryna, áleýmettik nysandarǵa shabýyldaý – ekstremızmniń belgisi

NUR-SULTAN. QazAqparat – Polıtsııa, ákimshilik ǵımarattaryna, áleýmettik nysandarǵa shabýyldaý – ekstremızmniń belgisi. Bul týraly QR Memlekettik hatshysy Erlan Qarın málim etti, dep habarlaıdy QazAqparat tilshisi.

«Taıaýda ótken brıfıng barysynda Almaty qalalyq polıtsııa departamentiniń bastyǵy ońtústik astanadaǵy oqıǵalardyń órbýine qatysty tolyq hronologııany usyndy. Onyń sózinde qarýly shabýyldarǵa, oıran salý men tártipsizdikterge jalpy 20 myńǵa deıin adam qatysqany atap ótildi. Árıne, bul radıkaldardyń qatysýymen oryn aldy. Oıran salý, polıtsııa, quqyq qorǵaý organdarynyń ǵımarattaryna shabýyl jasaý, ákimshilik ǵımarattardy basyp alý, beıbit turǵyndarǵa, áleýmettik nysandarǵa, onyń ishinde aýrýhanalarǵa shabýyldaý – munyń barlyǵy zorlyq-zombylyq ekstremızminiń belgileri», - dedi Memlekettik hatshy «Habar 24» telearnasyna bergen suhbatynda.

Onyń atap ótýinshe, dál osyndaı zorlyq-zombylyq is-áreketterin aqtaýǵa bolmaıdy.

«Kóptegen ózge elde, onyń ishinde Eýropadada mundaı, taǵy da qaıtalap aıtamyn, zorlyq-zombylyq is-áreketteri zorlyqshyl ekstremızm jáne terrorızm dep birjaqty sıpattalady. Bul jalpy qabyldaǵan anyqtama. Sondyqtan bul jerde qandaı da bir pikirtalas bolmaýy kerek sııaqty. Memlekette de, qoǵamda da bir ǵana ádis bolýy tıis. Nelikten mundaı ádis bolýy tıis? Biz mundaı is-árekettiń jolyn kesýimiz qajet. Mundaı zorlyq-zombylyq ıdeologııasyna, zorlyqshyl ekstremızm ıdeologııasyna tosqaýyl qoıýymyz kerek. Bul oqıǵalar terrorızm aktisi retinde sózsiz baǵalanýy tıis»,- dedi Erlan Qarın.

Memlekettik hatshynyń atap ótýinshe, terrrorımdi nanym-senim júıesi retinde qaramaý kerek. Terrorızm – bul halyqty úreılendirý jáne qorqytý strategııasy, ádisi.