Erlan Karın: Parlamenttik oppozıtsııa týraly zań jobasy - bul múldem jańa norma

NUR-SULTAN. QazAqparat - QR Prezıdentiniń keńesshisi Erlan Qarın Májilis maquldaǵan parlamenttik oppozıtsııaǵa qatysty zań jobasyna pikir bildirdi, dep habarlaıdy QazAqparat.

«Búgin Májilistiń jalpy otyrysynda 2019 jyldyń jeltoqsanynda ótken Ulttyq keńestiń ekinshi otyrysynda jarııalanǵan prezıdenttik saıası reformalar toptama aıasynda ázirlengen taǵy bir mańyzdy zań jobasy qaraldy. Atap aıtqanda, májilismender «QR Parlamenti jáne onyń depýtattarynyń mártebesi týraly» QR Konstıtýtsııalyq zańyna tolyqtyrýlar engizý týraly» QR zańynyń jobasyn talqylady. Atalǵan zań jobasynda parlamenttik oppozıtsııa (azshylyq) ınstıtýtyn engizý, sonymen qatar parlamenttik azshylyq depýtattarynan Parlament Májilisiniń bir turaqty komıtetiniń tóraǵasy jáne 2 hatshysy laýazymynda kandıdatýra usyný quqyǵyna kepildik berý kózdelgen. Bul oraıda eń mańyzdysy, oppozıtsııa usynǵan kandıdatýraǵa daýys berý oppozıtsııa ókilderiniń biri saılanǵanǵa deıin jalǵasatyn bolady. Basymdyqqa ıe partııa ókili bul laýazymǵa saılana almaıdy», - dep jazdy Erlan Karın Facebook paraqshasynda .

Onyń atap ótýinshe, jańa normalarǵa sáıkes, parlamenttik oppozıtsııaǵa parlamenttik tyńdaýlar ótkizý, sondaı-aq Májilistegi Úkimet saǵatynyń kún tártibin jasaqtaý quqy,y beriledi. Bul normalardy paıdalaný úshin belgili bir partııa ózin oppozıtsııamyn dep jarııalaý tıis.

«Ulttyq keńes uıytqy bolǵan bul zań jobasy ózge de zań jobalary sııaqty talqylaýlar men pikir almasýdyń uzaq jolynan ótti. Atap aıtqanda, ol Májilistiń barlyq komıtetterinde talqylandy. Tek bas komıtettiń ózinde osy zań jobasy boıynsha jumys tobynyń 7 otyrysy boldy. Búgin de japy otyrys barysynda bul zań jobasyna qatysty óte qyzyý pikirtalas boldy. Degenmen, basqa zań jobalaryna qaraǵanda oǵan depýtattardyń ózderi, onyń ishinde «Aq jol» partııasynyń fraktsııasy bastamashylyq jasaǵan edi. Bul da tań qalarlyq jaıt emes. Sebebi bizdiń zańnamamyzdaǵy múldem jańa norma jaıynda sóz bolyp otyr. Jáne de tek zańnamada ǵan emes, tolyqtaı alǵanda saıası tájirıbede jáne mádenıette», - dedi QR Prezıdentiniń keńesshisi.

Eske alsaq, Májilis Parlamenttik oppozıtsııaǵa kepildik beretin qadamdardy maquldaǵany týraly habarlaǵan bolatynbyz.