Erlan Qarın Ózbekstan Prezıdentiniń kómekshisi Saıda Mırzıeevamen kezdesti
ASTANA.KAZINFORM — Memlekettik keńesshi Erlan Qarın Ózbekstan Respýblıkasy Prezıdentiniń kómekshisi Saıda Mırzıeevamen kezdesti. Bul týraly Aqordanyń baspasóz qyzmeti habarlady.
Qazaqstan Respýblıkasynyń Memlekettik keńesshisi Erlan Qarın elimizge jumys saparymen kelgen Ózbekstan Respýblıkasy Prezıdentiniń kómekshisi Saıda Mırzıeevamen júzdesti.
Kezdesýde taraptar mádenı-gýmanıtarlyq saladaǵy eki jaqty qarym-qatynastyń ózekti máselelerin, sondaı-aq birlesken jobalardy júzege asyrý perspektıvasyn talqylady. Mádenıet jáne óner salasyndaǵy yqpaldastyqty tereńdetý ári tájirıbe almasý máselelerine basa nazar aýdaryldy.
Erlan Qarın Qazaqstanda júrgizilip jatqan ózgerister, sonyń ishinde Prezıdent Qasym-Jomart Toqaevtyń Ulttyq quryltaıdyń Býrabaıda ótken IV otyrysynda kótergen jańa bastamalary týraly aıtty.
Jumys sapary aıasynda eki el arasyndaǵy mádenı dıalogty damytýǵa baǵyttalǵan is-sharalar uıymdastyrylady. Atap aıtqanda, Erlan Qarın men Saıda Mırzıeeva Á. Naýaı atyndaǵy Ózbekstan memlekettik opera jáne balet Úlken teatrynyń «Lazgı. Tanets dýshı ı lıýbvı» atty qoıylymyn tamashalady. Sonymen qatar sýretshi Oral Tańsyqbaevtyń keskindemelik jáne grafıkalyq jumystarynyń kórmesi ótedi.
Kezdesý qorytyndysy boıynsha taraptar mádenı-gýmanıtarlyq saladaǵy tyǵyz yntymaqtastyqty jalǵastyrýǵa ýaǵdalasty.
Aıta ketelik týrıster áz-Naýryzdy birden eki elde – Qazaqstan men Ózbekstanda qarsy ala alatyny týraly jazǵan edik.