Erlan Qarın: Nursultan Nazarbaevta qandaı mártebe men ókilettik saqtalady
«Endi Nursultan Nazarbaevta qandaı mártebe men ókilettik saqtalady? Prezıdenttik ókilettigi toqtaǵannan keıin Nursultan Nazarbaev Tuńǵysh Prezıdent - Elbasy mártebesine aýysty. Bul saıası-quqyqtyq mártebe «Qazaqstan Respýblıkasynyń Tuńǵysh Prezıdenti - Elbasy týraly» Konstıtýtsııalyq Zańmen bekitilgen. Atalǵan Zań Konstıtýtsııalyq ekenin erekshe atap ótken jón. Ol 2000 jyldyń shidesinde qabyldanyp, 2010 jáne 2017 jyldary tolyqtyryldy. Onyń ishinde bastapqydaǵy «Tuńǵysh Prezıdent» saıası-quqyqtyq mártebesi Elbasy mártebesimen keńeıtildi. Zańda prezıdenttik ókilettilik toqtaǵannan keıin, Nursultan Nazarbaevtyń aıryqsha quzyreti men kepildikteri, sondaı-aq saıası ári quqyqtyq jaǵdaıy belgilengen», - dep jazdy E. Qarın Telegram-daǵy paraqshasynda.
Osy oraıda E. Qarın atalǵan zańǵa sáıkes, Tuńǵysh Prezıdent - Elbasy Qaýipsizdik Keńesin, Qazaqstan halqy Assambleıasyn basqaratynyn, Konstıtýtsııalyq Keńestiń quramyna enetinin eske saldy. Sonymen qatar, Elbasy el úshin mańyzdy máselelerdi talqylaý kezinde Parlamentte, Úkimet otyrystarynda sóz sóıleýge quqyly.
Nursultan Nazarbaev memlekettik qurylys, ishki jáne syrtqy saıasat, sondaı-aq el qaýipsizdigine qatysty mańyzdy máseleler boıynsha bastamalarmen Qazaqstan halqyna, memlekettik organdar men laýazymdy tulǵalarǵa úndeý jasaı alady. Munymen qosa, N. Nazarbaevtyń bastamalary memlekettik organdarmen, laýazymdy tulǵalarmen qarastyrýǵa mindetti bolyp sanalady. Memlekettik saıasattyń negizgi baǵyttary boıynsha bastamalar mindetti tártipte onymen birge kelisýge jatady.
Tuńǵysh Prezıdent-Elbasy qyzmetin qamtamasyz etý úshin Keńse qurylady. Nursultan Nazarbaevtyń qaýipsizdigin qamtamasyz etý QR Memlekettik kúzet qyzmeti bólimshesine júkteledi.
«Qazaqstan Respýblıkasynyń Tuńǵysh Prezıdenti - Elbasy týraly» Konstıtýtsııalyq Zańda bekitilgen aıryqsha quzyretten bólek, Nursultan Nazarbaev Nur Otan partııasynyń Tóraǵasy bolyp qala beredi. Partııa músheleri Parlament pen jergilikti atqarýshy organdarda basym kópshilikke ıe. Bir sózben aıtqanda, álemdik saıası tarıhta jańa fenomen paıda boldy - ol saıası kóshbasshylyqtyń qazaqstandyq modeli», - dep túıdi Erlan Qarın.
