Erlan Qarın Memlekettik syılyq berý jónindegi komıssııa otyrysyn ótkizdi
ASTANA. KAZINFORM — Memlekettik keńesshi Erlan Qarınniń tóraǵalyǵymen ál-Farabı atyndaǵy ǵylym men tehnıka jáne Ahmet Baıtursynuly atyndaǵy gýmanıtarlyq ǵylymdar salasyndaǵy 2025 jylǵy Qazaqstan Respýblıkasynyń memlekettik syılyqtaryn berý jónindegi komıssııanyń qorytyndy otyrysy ótti. Bul týraly Aqorda málim etti.
Memlekettik syılyqtarǵa úmitker retinde barlyǵy 23 jumys usynyldy. Aldyn ala irikteýden keıin ekinshi kezeńge alty jumys ótti.
Komıssııa jumystardy qarap, memlekettik ǵylymı-tehnıkalyq saraptama qorytyndysyn tyńdaý nátıjesinde tıisti usynymdar ázirledi.
— Mundaı syılyqqa ıe bolý ǵylym men tehnıka salasyndaǵy qaıratkerdiń eńbegi joǵary deńgeıde moıyndalǵanyn bildiredi. Ári bilimniń jańa salasyn nemese bilimniń bir salasynda jańa baǵytty ashqan ǵylymı jańalyqtarǵa, monografııalar men ǵylymı jumystarǵa, tehnıkanyń, materıaldar men tehnologııalardyń jańa túrlerin oılap taýyp, onyń óndirisin uıymdastyrǵandarǵa, sondaı-aq áleýmettik-ekonomıkalyq salanyń basym mindetterin sheshýge jáne elimizdiń básekege qabilettiligin arttyrýǵa septigin tıgizetin ǵylymı, ǵylymı-tehnıkalyq jáne ınnovatsııalyq qyzmet nátıjeleri úshin beriledi, — delingen habarlamada.
Buǵan deıin Erlan Qarınniń tóraǵalyǵymen Qazaqstan Respýblıkasy Prezıdenti janyndaǵy Jastar saıasaty jónindegi keńestiń otyrysy ótken bolatyn.