Erlan Qarın memlekettik organdarǵa etnosaralyq qatynastar salasyna qatysty tapsyrma berdi
ASTANA. KAZINFORM – Memlekettik keńesshi etnosaralyq kelisimdi nyǵaıtý máselelerine arnalǵan jıyn ótkizdi. Bul týraly Aqordanyń baspasóz qyzmeti habarlady.
Basqosýǵa Prezıdent Ákimshiligi qurylymdyq bólimsheleriniń basshylary, ortalyq memlekettik organdardyń ókilderi, sondaı-aq Jambyl jáne Túrkistan oblystarynyń ákimderi qatysty.
Jıynda óńirlerdegi etnosaralyq turaqtylyqty qamtamasyz etýge baǵyttalǵan jumystar týraly baıandaldy.
Sondaı-aq azamattyq qoǵam ınstıtýttarymen ózara is-qımyl, memlekettik aqparattyq saıasatty júzege asyrý, Qazaqstan halqy Assambleıasynyń jumys tásilderin odan ári jetildirý máseleleri qaraldy.
– Bıylǵy qarashada Memleket basshysy ıdeologııalyq jumystyń negizin aıqyndaıtyn «Qazaqstan Respýblıkasy ishki saıasatynyń negizgi qaǵıdattary, qundylyqtary men baǵyttary» atty tujyrymdamalyq qujatty bekitti. Etnosaralyq qatynas salasy qujattaǵy basym baǵyttyń biri retinde qamtylǵan. Bul atalǵan salanyń memleket úshin qanshalyqty mańyzdy ekenin kórsetedi, – dedi Memlekettik keńesshi.
Erlan Qarın memlekettik organdarǵa etnosaralyq qatynastar salasyndaǵy aldaǵy 2026 jylǵa arnalǵan basym baǵyttar jóninde naqty tapsyrma berdi.
Aıta keteıik, Qazaqstan azamattarynyń 95%-dan astamy etnosaralyq qatynasty turaqty dep sanaıdy.