Erlan Qarın memlekettik saraptamalyq qurylymdardyń basshylarymen kezdesti

ASTANA. QazAqparat - Memlekettik keńesshi Erlan Qarın memlekettik saraptamalyq qurylymdardyń basshylarymen kezdesý ótkizdi, dep habarlaıdy QazAqparat Aqordanyń resmı saıtyna silteme jasap.

Memleket basshysy Ulttyq quryltaıdyń II otyrysynda memlekettik saıasatty sapaly saraptamalyq-taldamalyq qujattarmen qamtamasyz etýdi tapsyrǵany belgili.

Osy oraıda Erlan Qarın analıtıkalyq qurylymdardyń basty mindeti memlekettik organdar úshin keshendi zertteýler júrgizý ekenin atap ótti. Sonymen birge ol saraptamalyq ınstıtýttar men ortalyqtar arasyndaǵy ózara yntymaqtastyqty damytý jáne bir-birimen materıaldar almasýy qajet ekenine nazar aýdardy.

Jıyn sońynda memlekettik saıasatty saraptamalyq qujattarmen qamtamasyz etýdiń tıimdiligin arttyrý jónindegi usynymdar ázirlendi.

Osyǵa deıin Memleket basshysynyń Ulttyq quryltaıda kótergen bastamalaryn júzege asyrý jospary qabyldanǵanyn jazǵan edik.