Erlan Qarın: Memleket basshysynyń reformalary eldiń ál-aýqatyn arttyrýǵa baǵyttalǵan
ASTANA. KAZINFORM – Memlekettik keńesshi Erlan Qarın áleýmettik jelidegi jazbasynda elimizde júzege asyrylyp jatqan oń ózgeristerge qatysty pikir bildirdi.
Onyń aıtýynsha, Memleket basshysy Qasym-Jomart Toqaevtyń bastamasymen júrgizilip jatqan reformalardyń naqty nátıjeleri óńirlerde aıqyn kórinis taýyp jatyr. Keıingi jyldary jańa avtojoldar, temirjol jelileri, áýejaılar, saparjaılar, kópirler jáne basqa da ınfraqurylymdyq nysandar paıdalanýǵa berilip, halyqtyń ıgiligine qyzmet ete bastady.
Erlan Qarın óz kezeginde jýrnalıst Ádil Baltabaevtyń daıyndaǵan vıdeosyna erekshe alǵysyn bildirdi. Memlekettik keńesshi sondaı-aq qazirgi reformalardyń halyqtyń ómir sapasyn jaqsartýǵa baǵyttalǵanyn jáne eldiń ár aımaǵynda jańa ınfraqurylymdyq jobalardyń iske qosylyp jatqanyn jetkizdi. Ol sonymen qatar eldegi oń ózgeristerdiń aldaǵy ýaqytta da jalǵasatynyn jáne jańa jobalardyń júzege asyrylatynyn aıtty.
– Prezıdent júrgizip otyrǵan saıasattyń birden-bir úlken jetistigi – qoǵamdyq sanada bastalǵan ózgeris. Memleket basshysy «Taza Qazaqstan», «Zań jáne Tártip» qaǵıdattaryn jalpyulttyq qundylyq retinde ornyqtyrýda. Endigi maqsat – bul qundylyqtardy qoǵamdyq sanada tereńdetý, ony árbir adamnyń daǵdysy men ádetine aınaldyrý. Búginde jastarymyz aıtyp júrgendeı qazaqtyń praım-erasy bastalǵanyna óz basym kámil senemin, - dedi Erlan Qarın.
Eske sala keteıik, buǵan deıin Erlan Qarın Konstıtýtsııalyq reformany iske asyrý jumysy júıeli túrde jalǵasyp jatqanyn aıtqan edi.
