Erlan Qarın Májiliste jerge qatysty zań jobasynyń maquldanýy týraly pikir bildirdi

NUR-SULTAN. QazAqparat – QR Prezıdentiniń kómekshisi Erlan Qarın Májiliste jerdi sheteldikterge berýge birjola tyıym salýdy kózdeıtin zań jobasynyń birinshi oqylymda maquldanýyna baılanysty pikir bildirdi, dep habarlaıdy QazAqparat tilshisi.

«Sheteldikterge jáne óziniń úlesinde sheteldik qatysýy bar zańdy tulǵalarǵa aýyl sharýashylyǵy jerlerin satýǵa, jalǵa berýge zań júzinde tyıym salýdy qamtyǵan Prızıdenttik zań jobasy Májiliste birinshi oqylymnan ótti. 2021 jyldyń 12 naýryzynda Prezıdent retinde zań shyǵarýǵa bastamashylyq etý quqyǵyn paıdalanyp, Qasym-Jomart Toqaev Májiliske atalǵan zań jobasyn engizdi. Jumys tobynyń 3 otyrysy (18,29 mamyrda jáne 5 sáýirde), sondaı-aq Agrarlyq máseleler komıtetiniń keńeıtilgen otyrysy (30 naýryz) ótti. Osy pikir almasýlarǵa qatysýshylar qujatty tolyqtaı qoldady jáne Májilistiń jalpy otyrysyna shyǵaryldy», - dep jazdy E. Qarın Telegram paraqshasynda.

Osy oraıda ol búgin ótken jalpy otyrysta zań jobasy birinshi oqylymda qaralǵanyn eske saldy.

«Zań jobasynyń negizgi erejelerin Aýyl sharýashylyǵy mınıstri Saparhan Omarov tanystyrdy. Talqylaý qorytyndysy boıynsha Májilistiń barlyq fraktsııalarynyń depýtattary qujatty birinshi oqylymda maquldady. Endi zań jobasy ekinshi oqylymda qaralatyn bolady», - dedi E. Qarın.

Budan buryn habarlanǵandaı, búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine jer qatynastary máseleleri boıynsha ózgerister men tolyqtyrý engizý týraly» zań jobasy birinshi oqylymda maquldandy.