Erlan Qarın: Qytaı kınofestıvali - mádenıetterdi jaqyndastyrýdyń jańa kópiri

«Uly dala eli men Qytaı baılanysy, dostyǵy men ózara qarym-qatynas tarıhy myńdaǵan jyldardan bastaý alady. Bizdiń halyqtarymyzdyń baılanysy bizdiń dáýirimizge deıingi zamannan bastaý alady. Sol kezdegi eki el arasyndaǵy tyǵyz qarym-qatynas nátıjesinde Uly Jibek joly boı kótergeni tarıhtan belgili. Endi mine, Uly Jibek jolyn qaıta jandandyrýǵa tarıh jańa múmkindikter berip otyr. Osydan tórt jyl buryn QHR Tóraǵasy Sı Tszınpın myrza  alǵash ret Qazaqstanǵa resmı saparmen kelgende tuńǵysh ret «Bir beldeý, bir jol» jobasyn qurý ıdeıasyn jarııalaǵan bolatyn. Bul shyndyǵynda da tarıhı bastama edi. Óz kezeginde Qazaqstan Prezıdenti Nursultan Nazarbaevtyń bastamasymen 2014 jyly Qazaqstanda «Nurly jol» ınfraqurylymdyq damý baǵdarlamasy jarııalandy. Onyń kózdegen maqsaty - eldiń áleýetin kóterý. Bul joba «Jibek joly» ekonomıkalyq beldeýi ekonomıkasymen tolyqtaı ushtasyp jatyr», - dep toqtaldy ol.

Sonymen qatar Erlan Qarın  Uly dala eli baıaǵydan órkenıetter arasyn baılanystyratyn altyn kópir rólin atqaryp kele jatqanyn aıtty. «Ol arqyly eki el arasynda ekonomıkalyq qatynastarmen birge, rýhanı jáne mádenı baılanystar qalyptasty. Endeshe, búgingi bastama - mádenıetterimizdi jaqyndastyrýdyń jańa kópiri», - dedi Basqarma tóraǵasy.

Aıta keteıik, Qytaı kınosy festıvali Astanada 7-18 maýsym aralyǵynda ótedi. Elordalyqtar men qala qonaqtary festıval aıasynda «Іle ózeni», «Shynaıy mahabbat», «Gúlim», «Qaterli isik myrza, ketińiz», «Qasqyr totemi» syndy týyndylardy tamashalaı alady.

«Qazaqstan» respýblıkalyq teleradıokorporatsııasy men QHR Baspasóz, baspa, radıo, kıno  jáne televızııa isi jónindegi memlekettik basqarmasy  uıymdastyrǵan bul sharanyń arnaıy qonaǵy retinde álemdik kınematografııanyń juldyzy, qytaı akteri, kınorejısser, kınoprodıýser Djekı Chan boldy.