Erlan Qarın: Qylmyskerlerdi termınatorlar men atqyshtar dep ásireleýdiń qajeti joq
ASTANA. QazAqparat - Qazaqstandyq saıası jáne qoǵamdyq qaıratker, belgili saıasattanýshy, ǵalym, pýblıtsıst, Qazaqstan strategııalyq zertteýler ınstıtýtynyń dırektory Erlan Qarın qazaqstandyqtardy ómirlerin qurban etip lańkesterdi toqtatqandardy esten shyǵarmaýǵa shaqyrdy.
"Búgin Tarazdaǵy qaıǵyly oqıǵaǵa 5 jyl toldy. 2011 jylǵy 12 qarashada biz terrorızm qaýpimen alǵash ret betpe bet kezdestik. Biz osyndaı oqıǵalardyń bizde de bolýy múmkin ekenin sezinip, úreı men qorqynyshqa boı aldyrdyq. Biraq, sonymen qatar aramyzda bizdiń tynyshtyǵymyz ben qaýipsizdigimizdi óz ómirin qıyp qorǵaýǵa daıyn jáne erlik tanyta alatyndardyń bar ekendigin bildik. Bul ózgelerdiń ómirin saqtap qalý úshin granatany keýdesimen japqan kapıtan Ǵazız Baıtasov. Bes aı buryn Aqtóbedegi teraktide maıor Danıel Maılybaev alǵashqy oqty ózi qabyldap, qylmystyq topqa qarsy turdy. Bir aıdan soń polıtsııa starshınasy Aıan Galıev esinen adasqan adam óltirýshini óz ómirin qıyp toqtata aldy», - dep jazdy E.Qarın Facebook-tegi paraqshasynda. Saıasattanýshy olardyń esimi eske sırek alynatynyna qynjylatyndyǵyn bildirdi. «Esesine, barynsha kóp adamdy óltirýdi armandaıtyn essiz qylmyskerlerdiń bıografııasy men sýretteri kóptep sıpattalǵan». Munymen de qoımaı, olardy obrazdy, tipti romantıkalyq attarmen ataımyz - "Tarazdyq termınator" nemese "Almatylyq atqysh". Sodan soń ósip kele jatqan jas urpaq eliktep, úlgi alatyn ıdealdar nege joq deımiz. Osy ıdealdardy izdeýdiń, oıdan shyǵarýdyń qajeti joq. Óz boryshyn adal oryndaǵandardy esten shyǵarmaı, olardyń týǵan-týys, jaqyndaryna qoldaý kórsetý qajet. Sondyqtan da osyndaı ataýly kúnderde naǵyz erlerdiń «Qazaqstan batyrlarynyń» esimderin umytpaı eske alyp, qasterlesek jas urpaq bilip júrer edi», - deıdi E.Qarın.
