Erlan Qarın: Konstıtýtsııalyq komıssııanyń qurylýy — tarıhı oqıǵa

ASTANA. KAZINFORM — Memlekettik keńesshi — Konstıtýtsııalyq komıssııa tóraǵasynyń orynbasary Erlan Qarın Konstıtýtsııalyq reforma jónindegi Konstıtýtsııalyq komıssııanyń qurylýyn tarıhı oqıǵa dep baǵalady. 

 — Konstıtýtsııalyq komıssııanyń qurylýyn tarıhı oqıǵa deýge bolady. Qazaqstan aýqymdy ózgeristiń, túbegeıli betburystyń aldynda tur. Halqymyz ult jylnamasyndaǵy jańa kezeńge qadam basqaly otyr. Mine, osyndaı sheshýshi sátte bizge asa mańyzdy mıssııa júkteldi, — dedi ol.

Erlan Qarınniń paıymdaýynsha, bul mıssııany alyp júrý – úlken jaýapkershilik.

— Búgin osy zalǵa túrli salanyń kásibı mamandary, tájirıbesi mol, elge belgili azamattar jınalǵan. Bárimizdiń maqsat-mindetimiz — ortaq. Sondyqtan, osy aıryqsha mindetti abyroımen atqaryp shyǵamyz dep senemin, — dedi Memlekettik keńesshi.

Aıta keteıik, Jibek Joly arnasy Konstıtýtsııalyq reforma jónindegi komıssııanyń birinshi otyrysyn tikeleı efırde kórsetip jatyr. 

Buǵan deıin Konstıtýtsııalyq komıssııanyń quramynda kimder kirgenin jazǵan edik.